KİV: İran qlobal internetlə əlaqəni kəsməyə hazırlaşır

Ölkədə davam edən etirazlar fonunda İran rəhbərliyi ölkəni qlobal internetdən ayırmaq üçün hazırlıqlara başlayıb.

Bu barədə "The Guardian" nəşri məlumat yayıb.

Məlumata görə, İran artıq xüsusi "ağ siyahı"sını yaradıb. Buraya yerli axtarış sistemləri, xəritələr, mesajlaşma tətbiqləri və yalnız dövlət tərəfindən təsdiqlənmiş videoların yayılmasına icazə verən xidmətlər daxildir.

Rəqəmsal hüquqlar üzrə ekspert Amir Raşidi isə qeyd edib ki, İran daxili internetin "skelet versiyasını" idarə edir.

Xatırladaq ki, 2025-ci il dekabrın 29-da Tehranda İran rialının kəskin düşməsi səbəbindən ticarətçilərin etiraz aksiyaları başlayıb. Bir gün sonra etirazlara tələbələr də qoşulublar. Narazılıqlar qısa müddətdə İranın əksər iri şəhərlərinə yayılıb. 2026-cı il yanvarın 2-də vəziyyət daha da gərginləşib - şəhər küçələrində naməlum silahlı qruplar peyda olub. Etirazçılarla hüquq-mühafizə orqanları arasında silahlı toqquşma halları artıb.

İğtişaşların zirvəsi 8 yanvar axşamına təsadüf edib, bu zaman ən azı 12 mülki vətəndaş, o cümlədən bir uşaq həlak olub. Hakimiyyət orqanları 25 hüquq-mühafizə əməkdaşının həlak olduğunu bildirib. Tehran meri Əlirza Zakani deyib ki, etirazçılar paytaxtda 25 məscidi yandırıb, 26 bank, üç tibb mərkəzi, 10 dövlət müəssisəsi, 48 yanğınsöndürən maşın, 42 avtobus və təcili yardım maşını, həmçinin 24 mənzilə ziyan vurublar. İran hakimiyyəti iğtişaşçıları terrorist adlandırıb və hadisələrin təşkilində İsrail və ABŞ-ni təqsirləndirib.