ABŞ Administrasiyası Qəzza zolağında iki il müddətinə beynəlxalq təhlükəsizlik qüvvələrinin yerləşdirilməsi ilə bağlı qətnamə layihəsini BMT Təhlükəsizlik Şurasına göndərib.

Bu barədə məlumatı "Axios" müvafiq sənədə istinadla yayıb.

Sənədə görə, 2027-ci ilin sonunadək bölgəni idarə etmək səlahiyyəti sözügedən qüvvələrə veriləcək.

Bildirilir ki, beynəlxalq kontingent İsrail-Misir sərhədinin təhlükəsizliyinin təmin edilməsi, mülki əhalinin və humanitar dəhlizlərin qorunması, Fələstinin HƏMAS hərəkatının tərk-silah edilməsi də daxil olmaqla, sektorun hərbsizləşdirilməsi, habelə Fələstin polis qüvvələrinin hazırlanması mandatına sahib olacaq.

Layihəyə görə, bölgədə sülhməramlılar deyil, sabitləşdirici qüvvələr olacaq. İlk bölmələrin yanvar ayında yerləşdirilməsi planlaşdırılır, artıq bir sıra ölkələrlə, o cümlədən İndoneziya və Misirlə kontingentin tərkibi barəsində danışıqlar aparılır.

O da bildirilir ki, BMT Təhlükəsizlik Şurasında danışıqların təməlində məhz bu layihə olacaq və yaxın həftələrdə səsverməyə çıxarılacaq.

Xatırladaq ki, ABŞ Azərbaycana da Qəzzada sabitləşdirici qüvvələrə qoşulmağı təklif edib.скачать dle 11.3