İtaliyada "İnter"in qapıçısı avtomobillə əlil arabasında olan şəxsi vurub öldürdü

İtaliyanın "İnter" klubunun qapıçısı Xosep Martines avtomobili ilə elektrikli əlil arabasında olan 81 yaşlı kişini vurub.

Median.Az quicomo.it saytına istinadən xəbər verir ki, hadisə oktyabrın 28-də yerli vaxtla saat 9:40-da baş verib.

Məlumata görə, zərbə son dərəcə şiddətli olub, xilasedicilərin dərhal müdaxiləsinə baxmayaraq, yaşlı kişi hadisə yerində keçinib.

Təcili yardım xidmətlərinin və planlı yoxlamaların aparılması üçün yol müvəqqəti bağlanıb.

"İnter" klubu matəm əlaməti olaraq, baş məşqçi Kristian Çivunun saat 14:00-a planlaşdırılan mətbuat konfransını ləğv edib.

İspaniyalı qapıçının hadisədən sonra şokda olduğu bildirilir. 27 yaşlı futbolçu xəsarət almasa da, bu hadisədən çox sarsılıb.