Su obyektini çirkləndirən fabrikə qarşı inzibati icraat - SİMDNX tədbir gördü (Video)

Azərbaycan Dövlət Su Ehtiyatları Agentliyi yanında Suların İstifadəsinə və Mühafizəsinə Dövlət Nəzarəti Xidməti (SİMDNX) tərəfindən Sumqayıt şəhəri, Hacı Zeynalabdin qəsəbəsində yerləşən "Elat kəndli-fermer təsərrüfatı" Məhdud Məsuliyyətli Cəmiyyətinə (MMC) məxsus quşçuluq fabrikində formalaşan tullantı sularının lokal təmizləyici qurğu olmadan və hər hansı təmizlənmə, zərərsizləşdirilmə aparılmadan birbaşa Sumqayıt çayına və dolayısı ilə Xəzər dənizinə axıdılması faktı aşkar edilib.

SİMDNX-dən verilən məlumata görə, Azərbaycan Respublikası Su Məcəlləsinin 77-ci, 103-cü maddələrinin və "Ətraf mühitin çirkləndirilməsinə görə ödənişlərin tətbiqi haqqında" Azərbaycan Respublikası Nazirlər Kabinetinin 3 mart 1992-ci il tarixli 122 nömrəli Qərarından irəli gələn tələblərin pozulmasına görə faktla bağlı 11 iyul 2025-ci il tarixdə akt və Azərbaycan Respublikasının İnzibati Xətalar Məcəlləsinin 264.0.1-ci maddəsinə əsasən, inzibati xəta törətdiyinə görə "Elat kəndli-fermer təsərrüfatı" MMC barəsində hüquqi şəxs qismində "İnzibati xəta haqqında Protokol" tərtib edilib.

Həmçinin Azərbaycan Respublikası Qida Təhlükəsizliyi Agentliyi (AQTA) Kollegiyasının Qərarı ilə təsdiq edilmiş qaydalara riayət edilmədən fəaliyyətin həyata keçirildiyini nəzərə alaraq, müvafiq tədbirlər görülməsi üçün AQTA-ya müraciət ediləcək.

"Vətəndaşlardan su obyektlərinin çirkləndirilməsinə dair hallarla rastlaşdıqda dərhal qurumun sosial media hesabları vasitələri ilə məlumat vermələrini xahiş edirik", - deyə məlumatda qeyd edilib.