Gəncə Apellyasiya Məhkəməsində qətl törətməkdə təqsirləndirilən Asəf Məmmədovun barəsindəki hökmdən verilən apellyasiya şikayəti üzrə məhkəmə iclası başa çatıb.

Median.Az Pravda.az-a istinadən xəbər verir ki, hakim Müşfiq Məmmədovun sədrliyi ilə keçirilən prosesdə qərar elan olunub.

Qərara əsasən, A.Məmmədovun şikayəti təmin edilməyib.

İttihama görə, hadisə 19 fevral 2023-cü il tarixdə gecə saat 3:45-də Tərtər rayonunda qeydə alınıb.

Belə ki, Asəf Məmmədov həyat yoldaşı, 1981-ci il təvəllüdlü Gülnar Məmmədova və həyətdə usta işləyən 1991-ci il təvəllüdlü Namiq Allahverdiyevi güllələyərək qətlə yetirib.

Onun barəsində Cinayət Məcəlləsinin 120.2.2, 120.2.4 və 120.2.7-ci (xuliqanlıq niyyəti ilə, xüsusi amansızlıqla 2 və ya daha çox şəxsi öldürmə) maddələri ilə ittiham irəli sürülüb.

İstintaq vaxtı Asəf Məmmədov hadisəni qısqanclıq zəminində törətdiyini, evdə səsyazan qurğu quraşdırdığını və əldə etdiyi məlumatlara əsasən, bu cinayəti törətdiyini iddia edib. Lakin ekspertiza və digər araşdırmalar zamanı Gülnar Məmmədovanın ailəsinə xəyanət etməsini sübut edən hər hansı fakt aşkar edilməyib.

Qeyd edək ki, qətlə yetirilən 42 yaşlı Gülnarə Məmmədova Tərtər Rayon İcra Hakimiyyətinin Sosial-İqtisadi İnkişafın Təhlili və Proqnozlaşdırılması Şöbəsinin Baş məsləhətçisi vəzifəsində çalışıb.

Namiq Allahverdiyev cütlüyün evinin qonşuluğunda - Gülnar Məmmədovanın qardaşının həyətində atası ilə birgə usta işləyib.

Gəncə Ağır Cinayətlər Məhkəməsinin hökmü ilə təqsirləndirilən şəxs ömürlük məhkum edilib.скачать dle 11.3