Rusiya tərəfi iki ölkə arasında birbaşa hava əlaqələrinin bərpası müzakirələri çərçivəsində ABŞ-yə "Aeroflot" aviaşirkətinə qarşı sanksiyaların götürülməsini təklif edib.

Median.Az-ın "Kommersant"a istinadla verdiyi məlumata görə, bunu Rusiya xarici işlər naziri Sergey Lavrov bildirib.

Lakin onun sözlərinə görə, Vaşinqtondan hələ cavab alınmayıb.

Bəyanatın fonunda "Aeroflot"un səhmləri 4.27% artaraq 69.7 rubl səviyyəsinə çatıb.

Rusiya və ABŞ arasında birbaşa hava əlaqələri 2022-ci ildə ölkələr arasında münasibətlərin pisləşməsi fonunda dayandırılmışdı. ABŞ aviaşirkətlərinə Rusiya hava məkanına daxil olmaq, Rusiya aviaşirkətlərinə isə ABŞ hava məkanına daxil olmaq qadağan edilib. Həmin ildən Rusiyanın ən böyük aviaşirkəti olan "Aeroflot" sanksiyalara məruz qalıb.

Almatıdakı mətbuat konfransında Sergey Lavrov vurğulayıb ki, hava əlaqələrinin bərpası "Aeroflot"un sanksiyalardan çıxarılmasının nəticəsi olmalıdır.

"Bu təklifi biz hələ bir ay qabaq - Ər-Riyaddakı görüşdən əvvəl etmişdik. ABŞ bunu qəbul etdi. Hələlik heç bir cavab addımı görmədik", - deyə nazir bildirib.

Lavrovun sözlərinə görə, aprelin 10-da ABŞ ilə keçirilən görüşdə Rusiya nümayəndə heyəti bu təklifi xatırladıb. Rusiya XİN başçısı qeyd edib ki, hələlik ABŞ tərəfindən hər hansı irəliləyiş barədə məlumat yoxdur, lakin Rusiya bu məsələ üzərində işləməyə davam edəcək, çünki bu, "normallığa qayıdışdır".скачать dle 11.3