Bakıda "32 Beauty dent billur" klinikasına lift qoydurmaq istəyən baş həkimin 95 min manatı mənimsənilib.
Median.Az "Qaynarinfo"ya istinadla xəbər verir ki, 1988-ci il təvəllüdlü Zaur T. adlı şəxs barəsində Cinayət Məcəlləsinin 178.3.2-ci maddəsi ilə cinayət işi açılıb və işə məhkəmədə baxılıb.
Məhkəmədə məlum olub ki, baş həkim Sənan Məmmədov klinikanın ərazisini həm genişləndirmək, həm də tibb mərkəzinə lift qoyulması üçün müvafiq qurumlardan icazə almaq fikrinə düşüb. Sənan Məmmədov bunun üçün tikintiyə başlasa da, Nərimanov Rayon İcra Hakimiyyəti əməkdaşları tərəfindən işlər dayandırılıb.
Baş həkim daha sonra tanışının vasitəsilə Zaur T. adlı şəxslə tanış olub. O, Sənan Məmmədova Bakı Şəhər İcra Hakimiyyətindən tikintiyə icazə sənədlərini ala biləcəyini söz verərək, ondan ümumilikdə bu işin həyata keçirilməsi üçün 95 min manat pul alıb. Pul klinikanın baş direktoru Murad adlı şəxs tərəfindən təqsirləndirilən şəxsə göndərilib.
Zaur bu pulu borclarını ödəməyə və digər şəxsi ehtiyaclarına xərcləyib. Sonda baş həkim hüquq-mühafizə orqanlarına müraciət etməli olub.
Sənan Məmmədov ifadəsində təqsirləndirilən şəxsə 95 min manatı rüşvət qismində verilməsi üçün vermədiyini deyib: "Sözügedən pulu sadəcə olaraq, zəhmət haqqı kimi Zaura verdim".
Məhkəmənin qərarı ilə təqsirləndirilən şəxs 6 il müddətinə azadlıqdan məhrum edilib.
Şahidi olduğunuz hadisələri çəkib bizə göndərin!
Son Əlavə