Bakı Apellyasiya Məhkəməsində qəsdən sağlamlığa az ağır zərər vurmada təqsirləndirilən Şahmar Səfərzadə (ad, soyadı şərtidir) barəsindəki hökmdən dövlət ittihamçısı tərəfindən verilən apellyasiya protesti və apellyasiya şikayəti üzrə məhkəmə iclası başa çatıb.

Median.Az Pravda.az-a istinadla xəbər verir ki, hakim Əfqan Ələkbərovun sədrliyi ilə keçirilən prosesdə qərar elan olunub.

Qərara əsasən, protest və şikayət qismən təmin edilib, Səbail Rayon Məhkəməsinin hökmü ləğv edilib. Təqsirləndirilən şəxs Cinayət Məcəlləsinin 127.1-ci (qəsdən sağlamlığa az ağır zərər vurma) maddəsində nəzərdə tutulan cinayət əməlini törətməkdə təqsirli bilinib, cinayət məsuliyyətinə cəlbetmə müddəti keçdiyindən ona cəza təyin edilməyib. Zərərçəkmiş şəxsin mülki iddiası mənəvi ziyana aid hissədə qismən təmin edilib və ona vurulmuş mənəvi ziyanın əvəzi olaraq 500 yüz manat Şahmar Səfərzadən tutularaq zərərçəkmiş şəxsə ödənilməsi barədə qərar çıxarılıb. Zərərçəkmiş şəxsin mülki iddiası maddi ziyanın tutulması hissəsində təmin edilməyib.

İttihama görə, hadisə 03 iyul 2022-ci il tarixdə, saat 17 radələrində Bakı şəhəri, Səbail rayonu, Salyan şosesi, "Şıxov" çimərliyinin sahilində yerləşən "Qağayı" istirahət mərkəzində qeydə alınıb.

Belə ki, Şahmar Səfərzadə orada onunla birlikdə istirahətə gələn sevgilisi, zərərçəkmiş Minayə Məmmədzadə (ad, soyadı şərtidir) ilə mübahisə edib. Buna səbəb isə qadının həmin vaxt təqsirləndirilən şəxsin mobil telefonunda digər xanımla sevgi ismarıclarının olduğunu görməsi olub. Bu zaman zərərçəkmiş Şahmara irad bildirib. Nəticədə o, Minayənin bədəninin müxtəlif nahiyələrinə qəsdən əl və ayaqla zərbələr vuraraq, xəsarətlər yetirib.

Hadisədən sonra Şahmar Səfərzadə saxlanılaraq cinayət məsuliyyətinə cəlb edilib.

Səbail Rayon Məhkəməsinin hökmü ilə əməli törədilməsində təqsirliliyi sübuta yetirilmədiyindən ona bəraət verilib. Hökmdən narazı qalan dövlət ittihamçısı apellyasiya protesti və zərərçəkmiş apellyasiya şikayəti verib.скачать dle 11.3