Son illərdə Bakı ətrafında yerləşən Xırdalan və Masazır əraziləri mənzil bazarında ən çox maraq göstərilən bölgələrdən birinə çevrilib. Paytaxtın mərkəzində mənzil qiymətlərinin yüksək olması və vətəndaşların daha sərfəli alternativlər axtarması bu ərazilərə marağı artırır.
Xırdalan və Masazırda mənzillərin nisbətən ucuz olması alıcıları cəlb edən əsas səbəblərdəndir. Burada yeni tikilən yaşayış kompleksləri, fərdi evlər və ipoteka ilə satışa çıxarılan mənzillər xüsusilə gənc ailələr və orta gəlirli vətəndaşlar üçün əlverişli seçim hesab olunur. Eyni zamanda, bu ərazilərdə infrastrukturun inkişaf etməsi, yeni məktəblərin, uşaq bağçalarının, ticarət mərkəzlərinin və digər sosial obyektlərin açılması da bölgənin cəlbediciliyini artırır.
Bununla yanaşı, Xırdalan və Masazır istiqamətində əsas problemlərdən biri sıx tıxaclar və ictimai nəqliyyatın tam yetərli olmamasıdır. Bakı ilə əlaqəni təmin edən əsas yollar səhər və axşam saatlarında böyük sıxlıq yaşayır, bu da həmin ərazilərdə yaşayanların gündəlik həyatına təsir edir.
Qaynarinfo xəbər verir ki, məsələ ilə bağlı daşınmaz əmlak üzrə ekspert Elnur Azadov news24.az-a açıqlamasında bildirib ki, Masazır və Xırdalanda daha çox reginlardan gəlib burda məskunlaşan insanlar mənzil alıb:
"Azərbaycanda daşınmaz əmlaka yatırılan investisiyaların həcmi olduqca böyükdür və bir çox vətəndaş yığım kapitalını bu sahəyə yönəldir. Bu səbəbdən, Xırdalan və Masazırda mənzil bazarı aktiv inkişaf edir. Bu ərazilərdə daşınmaz əmlak bazarında rəqabət yüksəkdir. Bu isə həm satışların sürətli olmasına, həm də qiymətlərin nisbətən aşağı qalmasına səbəb olur. Məhz bu səbəbdən vətəndaşlar buradakı mənzillərə üstünlük verirlər. Bakı şəhərində hər hansı bir tikilini götürsək, onun alternativini tapmaq çətin olar, lakin Masazır və Xırdalanda sərfəli qiymətə müxtəlif variantlar tapmaq mümkündür".
Ekspertin fikrincə, yaxın illərdə Xırdalan və Masazırda mənzil bazarının daha da aktivləşəcəyi gözlənilir:
"Bu bölgələrin sürətlə inkişaf etməsi və əhali artımı ictimai nəqliyyatın vəziyyəti ilə bağlı müəyyən çətinliklər yaradır. Xüsusilə səhər və axşam saatlarında tıxaclar əsas problemlərdən biri kimi qalır. Bununla belə, Elnur Azadov hesab edir ki, həmin ərazilərə yeni ictimai nəqliyyat xətləri və digər alternativlərin çəkilməsi qiymətlərə ciddi təsir etməyəcək. Çünki daşınmaz əmlaka olan tələbat kifayət qədər yüksəkdir və qiymətlər rəqabət şəraitində formalaşır".
Yeni yaşayış komplekslərinin inşası, sosial infrastrukturun inkişafı və əhalinin buraya köç etməsi bu bölgələri daha da cəlbedici edəcək. Eyni zamanda, hökumətin infrastruktur layihələrinə diqqət ayırması və nəqliyyat imkanlarını genişləndirməsi həmin ərazilərdə yaşayışı daha rahat edəcək.
Ümumilikdə, Xırdalan və Masazır sərfəli qiymətləri və strateji mövqeyi ilə vətəndaşlar üçün cəlbedici seçim olaraq qalır.
Şahidi olduğunuz hadisələri çəkib bizə göndərin!
Son Əlavə