Gürcüstanın baş nazirinin I müavini, iqtisadiyyat və davamlı inkişaf naziri Levan Davitaşvili Tbilisidə işgüzar səfərdə olan Azərbaycanın rəqəmsal inkişaf və nəqliyyat naziri Rəşad Nəbiyevlə görüş keçirib. Görüş zamanı tərəflər Gürcüstan və Azərbaycan arasında nəqliyyat sahəsində əməkdaşlıq məsələlərini, əsas istiqamətləri və gələcək prioritetləri, həmçinin həyata keçirilən layihələri müzakirə ediblər.

Bu barədə Gürcüstanın İqtisadiyyat və Davamlı İnkişaf Nazirliyi məlumat yayıb.

Bildirilir ki, görüş zamanı Davitaşvili Gürcüstan və Azərbaycan arasında iqtisadi əməkdaşlığın mühüm istiqamətlərindən birinin nəqliyyat sahəsində əməkdaşlıq olduğunu vurğulayıb.

"Buna görə də biz hər il bir araya gəlirik və il üçün planları müzakirə edirik. Bu gün həmkarımla görüşdə birgə layihə olan Bakı-Tbilisi-Qars dəmir yolunun tikintisi məsələsini müzakirə etdik - işlərin yekun mərhələsi bu il istifadəyə veriləcək. Biz, həmçinin bu infrastrukturu idarə edəcək Gürcüstan və Azərbaycan arasında birgə müəssisənin yaradılması barədə danışdıq ki, bu da bizə bu sahəni daha səmərəli yükləməyə və daha çox yük cəlb etməyə imkan verəcək", - deyə Levan Davitaşvili bildirib.

Məlumatda vurğulanıb ki, İqtisadiyyat və Davamlı İnkişaf Nazirliyində keçirilən görüşdə nazir müavini Quram Quramaşvili, "Marabda-Kartsaxi" MMC-nin rəhbəri Levan Kankava, "Gürcüstan Dəmir Yolları" ASC-nin rəhbəri, İqtisadiyyat və Davamlı İnkişaf Nazirliyinin Dövlət Əmlakının Milli Agentliyinin direktoru İrakli Şengeliya iştirak ediblər.

Azərbaycanın rəqəmsal inkişaf və nəqliyyat naziri Rəşad Nəbiyevin rəhbərlik etdiyi nümayəndə heyətinə həmçinin Azərbaycan Dəmir Yollarının sədri Rövşən Rüstəmov, Azərbaycanın Gürcüstandakı səfirliyinin nümayəndəsi və nümayəndə heyətinin digər üzvləri daxil olub.

Görüşdə "Orta Dəhliz"in artan roluna və onun rəqabət qabiliyyətinin artırılması və əlavə yüklərin cəlb edilməsi üçün tərəflərin fəal iştirakı ilə həyata keçirilən tədbirlərə xüsusi diqqət yetirilib. Qeyd olunduğu kimi, bu, ölkələrə daha çox əlavə dəyər yaratmağa imkan verəcək. Tərəflər, həmçinin bu il mayın 1-dən başlayacaq Gürcüstan və Azərbaycan arasında sərnişin dəmir yolu əlaqəsinin açılması məsələsini müzakirə ediblər.

"Dəmir yolu ilə sərnişindaşımaları bizim turizm üçün çox vacibdir. Azərbaycanlı həmkarımızla görüşdə cari il üçün təchizat proqnozunu da müzakirə etdik. Əlbəttə ki, maksimum koordinasiya ilə regionda və beynəlxalq səviyyədə daha rəqabətqabiliyyətli ola bilməyimiz üçün planları və baxışları bölüşmək çox vacib idi", - deyə baş nazirin birinci müavini qeyd edib.скачать dle 11.3