Bildiyimiz kimi, "İstismar olunan minik avtomobillərinin Azərbaycan Respublikasının gömrük ərazisinə gətirilməsinin məhdudlaşdırılması haqqında" Nazirlər Kabinetinin Qərarı ilə 2023-cü ilin aprelindən zavod buraxılış tarixinə görə yaşı 10 ildən çox olan minik avtomobillərinin Azərbaycan ərazisinə gətirilməsi məhdudlaşdırılıb.

Bəs, görəsən, müasir çağırışlar fonunda tətbiq edilən 10 yaş limitinin azaldılmasına ehtiyac varmı?

Məsələ ilə bağlı nəqliyyat məsələləri üzrə ekspert Elməddin Muradlı bildirib ki, buna ehtiyac görmür:

"Çünki avtomobil istehsalçısı deyilik, Azərbaycanın daxili kütləvi avtomobil istehsalı yoxdur. Başqa ölkələrin müştərək zavodlarında avtomobillər yığılır. Buna görə də avtomobillər üçün qoyulan yaş həddi məqbuldur".

Ekspert vurğulayıb ki, məhdudiyyət yalnız qəzalı avtomobillərə qoyula bilər:

"Avtomobil parkının yenilənməsi yalnız bu formada həyata keçirilə bilər. Azərbaycanda buna çox ciddi ehtiyac var. Çünki alverçilər ancaq ciblərini fikirləşirlər. Onlar üçün avtomobilin hansı vəziyyətdə olması, bunun ölkəyə ziyan vurması əhəmiyyətli deyil. Qəzalı avtomobilləri ölkəyə gətirib kosmetik dəyişikliklərlə satırlar".

E.Muradlının sözlərinə görə, Azərbaycan gələcəkdə avtomobil istehsalçısı olsa, yerli istehsalı stimullaşdırmaq üçün xaricdən gətirilən avtomobillərlə bağlı müəyyən məhdudiyyətlər tətbiq edilə bilər.

"Amma bu gün buna ehtiyac yoxdur. Əksinə imkan yaratmaq lazımdır ki, Azərbaycanda avtomobil parkı yenilənsin, köhnə avtomobillərin yığışdırılması ilə bağlı stimullaşdırıcı addımlar atılsın, yeni, xüsusən hibrid, elektikli avtomobil gətirənlərə müəyyən güzəştlər edilsin", - deyə o qeyd edib.

Nəqliyyat məsələləri üzrə ekspert Aslan Əsədov isə açıqlamasında bildirib ki, Azərbaycan dünyada elektrikli avtomobillərin sürətlə yayılmasına adekvat yanaşır:

"Elektrikli avtomobillərin istehsalına, iş prinsipinə qarşı müəyyən təhlükələr var. Bəzi ölkələr elektrikli avtomobillərin istehsalı üçün müəyyən prosedurlara hazır deyil. İdxalı rəsmiləşən və yaxud ölkədə icarə verilən nəqliyyat vasitələrinə müəyyən məhdudiyyətlər tətbiq edirlər. Yaş limitinin qoyulması, utilizasiya proseslərinin aparılması bura daxildir".

Ekspert deyib ki, Azərbaycanda da avtomobilləşmənin əsas meyarlarından biri də nəqliyyat vasitəsinin yaşıdır.

"Ölkədə yaşı 10-dan çox olan kifayət qədər avtomobil var. Bu məsələ ilk növbədə taksilərdə, xüsusən taksi parklarında və istismara qəbul edilən nəqliyyat vasitələrinin yenilənməsində özünü büruzə verdi. Yaş məsələsini gündəmə gətirmək bizim üçün hələ tezdir. Çünki kifayət qədər yeni avtomobillər gəlib. Onların yaşının yenilənməsinə hələ bir neçə il lazımdır. Ona görə bu parkın yenilənməsi bir az sual doğurur, çünki vaxt aparan prosesdir", - deyə A.Əsədov fikrini yekunlaşdırıb.
//trendскачать dle 11.3