Rüşvət əvəzinə dünya çempionatına bilet - Meksikada məmur qalmaqalı

Meksikanın iki yüksək rütbəli məmuru cərimələrin azaldılması müqabilində futbol üzrə 2026-cı ildə keçiriləcək dünya çempionatına bilet tələb etdikdən sonra vəzifələrindən uzaqlaşdırılıblar.

Milli Şəffaflıq, Məlumata Giriş və Şəxsi Məlumatların Mühafizəsi İnstitutunun (INAI) əməkdaşları Conatan Mendoza Uzert və Migel Novoa Qomesin fəaliyyətləri Meksika Futbol Federasiyasının (FMF) dünya çempionatının açılışı üçün biletləri hədə-qorxu ilə tələb etmələrinə dair şikayət araşdırılana qədər dondurulub.

Dövlət qurumlarında şəffaflığı təmin etmək üçün 2002-ci ildə yaradılmış INAI-nin bu il Meksika hökumətinin qərarı ilə ləğv ediləcəyi bildirilir.

Qeyd edək ki, 2026-cı ildə dünya çempionatı ABŞ, Kanada və Meksikada keçiriləcək.