“Zəfər Günü bizə şəhidlərimizin mirasıdır”.
Bu sözləri “Report”a açıqlamasında Tərtər rayonunun Talış kənd sakini Əyyub Əkbərov deyib.
Zəfər sevincini doğma yurdlarında qeyd etdiyi üçün çox xoşbəxt olduğunu söyləyən Ə.Əkbərov qeyd edib:
“Otuz yaşımda torpağımı tərk etmək məcburiyyətində qaldım. Bakıda yaşadığım bu illər ərzində ən böyük arzum doğma yurduma, ata ocağıma geri dönmək idi. Şükürlər olsun ki, bu xoş günləri görmək mənə nəsib oldu, doğma yurduma qovuşdum. 30 illik fasilədən sonra həsrətində olduğumuz əzəli torpağımızdayıq”.
Ə.Ələkbərov bildirib ki, Talış kəndi əvvəllər də Qarabağın ən inkişaf etmiş kəndlərindən biri olub:
“İndi işğaldan azad edilmiş kəndlərimizi qurub-yaratmaq, inkişaf etdirmək ən böyük məqsədlərimizdəndir. Burada sürətli inkişaf və yüksəlişin şahidi oluruq. İşğalda olduğu illərdə Talış kəndinə çox böyük ziyan dəyib. Amma biz ruhdan düşmürük. Zəfər Günü bizim üzərimizə mühüm məsuliyyət qoyur.
Bu torpağın hər bir qarışında şəhidlərin qanı və izi var. Bu gün kəndimizin hər bir qarışında qələbənin qoxusu duyulur. Ona görə ki, burdan qalib Azərbaycan əsgəri keçib. Zəfər Günü bizə şəhidlərimizdən mirasdır. Bu yerlərin hər bir daşının qiymətini bilməliyik. Zəfər sevincini bizə yaşadan hərbçilərimizə, qazilərimizə təşəkkür edir, şəhidlərimizin ruhu şad olsun deyirəm”.
Şahidi olduğunuz hadisələri çəkib bizə göndərin!
Son Əlavə