“Ötən ilki qədər olmasa də, rayonlarda, kəndlərdə su çatışmazlığı ilə bağlı problemlər hələ də var”.

Bunu Oxu.Az-a açıqlamasında ekologiya və təbii sərvətlər nazirinin müavini Vüqar Kərimov bildirib.

Onun sözlərinə görə, son dövrlərdə havanın quraq keçməsi, ölkəyə transsərhəd çaylarla ötürülən suların azalması su ilə bağlı çətinliklər yaradır:

“Ölkə ərazisində su ehtiyatlarından səmərəli istifadənin təmin edilməsi, su təsərrüfatının idarə olunmasının təkmilləşdirilməsi və bu sahədə fəaliyyətin əlaqələndirilməsi məqsədilə Azərbaycan Respublikası Prezidentinin 2020-ci il 15 aprel tarixli Sərəncamı ilə komissiya yaradılıb.

Eyni zamanda, Azərbaycan Respublikası Prezidentinin 2020-ci il 27 iyul tarixli Sərəncamı ilə “Su ehtiyatlarından səmərəli istifadənin təmin edilməsinə dair 2020-2022-ci illər üçün Tədbirlər Planı” təsdiq edilib. Tədbirlər Planın icrası çərçivəsində bir çox işlər görülüb”.

V.Kərimov qeyd edib ki, yay mövsümündə hər gün Mingəçevir su anbarından Kür çayına ortalama 180-200 kubmetr su buraxılır:

“Buna baxmayaraq, həmin sular Xəzər dənizinə gəlib çatmır, ona görə də Neftçala ərazisinin su təchizatında problemlərə səbəb olur. Bilirsiniz ki, Azərbaycanda şimal və şimal-şərq küləkləri hakim küləklərdir.

Yay aylarında Kürdə suyun səviyyəsinin aşağı düşməsi zamanı bu küləklərin təsiri ilə Xəzər dənizinin suyu Kürə qarışır, hətta 15-20 kilometr tərs axınla hərəkəti müşahidə olunur. Nəticədə Kürün suyunun şorlaşması baş verir”.скачать dle 11.3