Lənkəranda şəxsi təsərrüfatların birində xırdabuynuzlu heyvanlar arasında xəstəlik yayılıb. Heyvanlar naməlum xəstəlikdən tələf olur.
Median.Az-ın oxu.az-a istinadən verdiyi məlumata görə, Digah kəndində Qasımovların təsərrüfatında xırdabuynuzlu heyvanlar arasında yayılan yoluxucu xəstəlik nəticəsində heyvanların dırnaqları uzanır, soyulur və çürüyür.
Daha sonra heyvanlar bir neçə gün oturaq vəziyyətdə qaldıqdan sonra tələf olurlar.
Təsərrüfat sahibi Dilbər Qasımova bidirib ki, onun 150-yə qədər qoyunu olub. Əksəriyyəti tələf olub. Yerli sahə baytarının vurduğu iynə-dərmanın da xeyri olmur. Xırdabuynuzlu heyvanların kütləvi şəkildə tələf olması təsərrüfatçıları çox narahat edir.
Yoluxucu xəstəliklərin insanlara və ya təsərrüfatda saxlanılan digər növ heyvanlara keçməsindən ehtiyat edirlər. Artıq dördüncü ildir ki, təsərrüfatda oxşar hadisə baş verir.
Lənkəran rayon Baytarlıq İdarəsindən problemdən yeni xəbər tutduqlarını bildirərək, kənddəki xırdabuynuzlu heyvanların olduğu təsərrüfatları nəzarətə götürəcəklərini deyiblər.
Lənkəran Rayon Baytarlıq İdarəsinin rəisi Əzizağa İsgəndərov bildirib ki, xəstəliyin nə olduğunu müəyyən etmək üçün onu birinci laboratoriya müayinə eləməlidir. Amma orada infeksiyadan söhbət gedə bilməz:
“Dırnaq çürüməsi mikrobakterioz xəstəlik ola bilər. Onların da peyvəndi baytarlıq idarəsinə verilmir. Lənkəran rayonunda havaların yağmurlu və rütubətli keçməsi ilə əlaqədar olaraq həmin xırdabuynuzlu heyvanlarda dırnaq xəstəliyinə təsadüf edilir. Dırnağı yara olmuş, zədələnmiş heyvan əyləşir, dura bilmir, qida məhsullarını qəbul edə bilmir, yekunda da tələf olur. Bu heyvanlar baytarlıq idarəsinin nəzarətindədir, yaxın günlərdə xəstəlik ləğv ediləcək”.
Əzizağa İsgəndərov həmçinin qeyd edib ki, heyvanlar vaxtlı-vaxtında peyvənd edilir və rayonda epizootik vəziyyət sabitdir.
Şahidi olduğunuz hadisələri çəkib bizə göndərin!
Son Əlavə