Rusiyada koronavirusun daha yoluxucu alt variantları yayılır

Rusiyanın əməkdar həkimi ölkədə koronavirusun daha yoluxucu alt variantlarının yayılmağa başladığını bildirib.

“Bir çox başqa ölkələrdə olduğu kimi, Rusiyada da koronavirusun “Omikron” ştammının əvvəlkilərdən daha yoluxucu olan və yeni xəstələnmə dalğasına səbəb ola biləcək alt variantları yayılmağa başlayır”.

Bu barədə Rusiyanın əməkdar həkimi Mixail Kaqan məlumat verib.

“Artıq bir sıra Avropa ölkələrində xəstələnmə hallarının artması müşahidə olunur, lakin indiyədək əvvəlki dalğalara xas olan ciddi xəstəliklər və ölüm halları müşahidə olunmur. Ancaq bu, arxayınlığa səbəb olmamalıdır. Aydındır ki, biz indi, xoşbəxtlikdən, 2020 və 2021-ci illərin narahatedici hadisələrindən uzaqdayıq və başqa bir dalğa artıq daha az narahatlıq doğurur. Lakin sonuncu variantların yoluxuculuğunu nəzərə alaraq, izdihamlı, qapalı yerlərdə maskaların taxılması etibarlı qorunma tədbiri olaraq qalır”.

Onun sözlərinə görə, pandemiyanın yeni mərhələsi hamını yeni variantların və yeni dalğaların mümkünlüyünə baxmağa vadar etməlidir ki, bunun üçün əvvəlcədən hazırlaşmağa dəyər.

Mənbə: Gazeta.ru