"Bu gün Türkiyə və Ukrayna arasında əməkdaşlığımıza dair həm təkbətək, həm də heyətlərarası önəmli görüşümüz oldu. Xüsusilə, FETÖ və digər terror təşkilatlarına qarşı birgə mübarizəmizi artırmaq istiqamətində razılığa gəldik”.

Türkiyə Prezidenti Rəcəb Tayyib Ərdoğan bu gün Ukrayna Prezidenti Vladimir Zelenski ilə İstanbulda görüşdükdən sonra keçirilən mətbuat konfransında belə deyib.

R.T.Ərdoğan bildirib ki, Türkiyə Ukraynanı regionda sülh, rifah və təhlükəsizliyin təminində açar ölkə olaraq görür.

Türkiyə Prezidenti Ukraynanın ərazi bütövlüyünü Krım daxil hər zaman dəstəklədiklərini vurğulayıb: "Türkiyə Krımın qanunsuz işğalını tanımır, Krım türklərinə Ukraynanın yüksək dairələri ilə birgə dəstəyimiz davam edəcək”.

"Heç bir virus aramızdakı dostluğa əngəl ola bilməz” deyən V.Zelenski isə Türkiyə ilə Ukrayna arasında strateji, eləcə də qarşılıqlı maraqların olduğu bütün sahələrdə əməkdaşlığı inkişaf etdirməyə hazır olduğunu bildirib: "BMT-nin 75-ci dönəm çərçivəsində işğal altındakı Krımda insan haqlarının müdafiəsini təmin etmək üçün yaxın əməkdaşlıq edəcəyik. Türkiyəni krımlıların hüquqlarını qorumaq üçün Krım layihəsinə dəvət etdim. Bu layihəni dəstəklədiyiniz üçün minnətdaram. Bu gün biz Donbasdakı çətin vəziyyəti müzakirə etdik. Böhranı aradan qaldırmaq və sülhü bərqərar etmək üçün yeganə yolun diplomatik danışıqlar olduğu qərarına gəldik”.

///APAскачать dle 11.3