“Araz” supermarketlər şəbəkəsi mətbuatda yeddi mağazasında karantin qaydalarının pozulduğu başlığı ilə dərc edilən məlumatlara münasibət bildirib.

“Araz” supermarketlər şəbəkəsinin PR meneceri Billurə Əmirova Oxu.Az-a açıqlamasında bildirib ki, Azərbaycan Respublikasının Qida Təhlükəsizliyi Agentliyi (AQTA) bir neçə obyektdə, həmçinin ərzaq satışı mağazalarında reydlər keçirib.

Onun sözlərinə görə, yoxlamalar həmçinin “Araz” supermarketlər şəbəkəsinə daxil olan yeddi mağazada da aparılıb:

“Aparılan reyd zamanı bir neçə marketimizdə temperatur rejimində 2-3 dərəcə oynama aşkarlanıb. Qeyd edilən problem isə dərhal mütəxəssislərin müdaxiləsi ilə aradan qaldırılıb. Maraqlısı isə budur ki, AQTA-nın paylaşdığı siyahıda nöqsanlar aşkarlanan digər şəbəkə marketlərin adları yer alsa da, media bu xəbəri “Araz”la bağlayıb və “Araz” supermarketlər şəbəkəsinin adını manşetə çıxarıb.

Bildirmək istərdim ki, ölkəmizdə pandemiyanın ilkin dövrlərindən etibarən yeni növ koronavirusun yayılmasının qarşısının alınması məqsədilə marketlərimizdə ciddi şəkildə dezinfeksiya tədbirləri həyata keçirilir, müştərilərimizin təhlükəsiz alış-verişini təmin etmək məqsədilə bütün qaydalara və tələblərə əməl olunur. “Araz” supermarketlər şəbəkəsinə daxil olan hər bir müştərinin yerindəcə hərarəti yoxlanılır, əlləri dezinfeksiya edilir, maska tələb olunur. O cümlədən sosial məsafənin qorunmasına nəzarət olunur”.скачать dle 11.3