Bakı Ağır Cinayətlər Məhkəməsində Şamaxı rayon sakini Kənan Əhmədovun (1983-cü il təv.) CM-nin 120.2.4-cü (xüsusi amansızlıqla qəsdən adam öldürmə) maddəsi ilə təqsirləndirilməsinə dair cinayət işi üzrə məhkəmə prosesi başa çatıb.

Median.Az xəbər verir ki, bu il aprelin 17-də Xəzər rayon Şağan qəsəbəsi, yeni yaşayış massivində Kütahi Məlikovanın (1986-ci il təv.) yaşadığı evdə bədəni üzərində zorakılıq əlamətləri olan meyitinin aşkar edilməsi faktına görə Xəzər rayon prokurorluğunda ilkin olaraq CM-nin 120.1-ci (qəsdən adam öldürmə) maddəsi ilə cinayət işi başlanılıb.

Cinayətin K.Məlikovanın qonşuluğunda yaşayan Kənan Əhmədov tərəfindən törədilməsi müəyyən edilib və o, Bakı Beynəlxalq Avtovağzalında tutularaq istintaqa cəlb olunub. Saxlanılan şəxs etiraf edib ki, qadının evinə tamah məqsədi ilə daxil olub, onu bıçaq zərbələri ilə qətlə yetirib və
mərhuma məxsus qızıl-zinət əşyalarını oğurlayıb.

Qeyd edək ki, oğurladığı qiymətli əşyalar və bıçaq ona məxsus həyətdə, basdırdığı yerdən aşkar edilib.

Məhkəmənin hökmü ilə təqsirləndirilən şəxs 20 il müddətinə azadlıqdan məhrumetmə cəzasına məhkum olunub.скачать dle 11.3