"Telegram"da iki funksiya silindi

"Telegram" "Yaxınlıqdakı insanlar" funksiyasını silib və "Telegraph" bloq platformasına media fayllarının yüklənməsini deaktiv edib.

Bu barədə mesencerin təsisçisi Pavel Durov "Telegram" kanalında məlumat verib.

"Biz "Telegram" istifadəçilərinin 0,1%-dən azının istifadə etdiyi, lakin botlar və fırıldaqçılarla bağlı problemlərə səbəb olan "Yaxınlıqdakı insanlar" funksiyasını sildik. Biz, həmçinin anonim şəxslər tərəfindən sui-istifadə edilən oflayn bloqumuz olan "Telegraph"da yeni media fayllarının yüklənməsini deaktiv etdik", - məlumatda bildirilir.

Durov əlavə edib ki, mesencer istifadəçilərinin əksəriyyəti cinayətlə əlaqəli deyil, lakin qeyri-qanuni fəaliyyətlə məşğul olanların 0,001%-i "Telegram" üçün pis imic yaradır. Onun sözlərinə görə, bu, bir milyard mesencer istifadəçisinin maraqlarını risk altına qoyur.

"Buna görə də, biz moderasiya ilə bağlı tənqiddən uzaqlaşmağa çalışırıq", - qeyd olunub.

Durov bildirib ki, "Yaxınlıqdakı insanlar" funksiyası əvəzinə mesencerdə "Yaxınlıqdakı biznes" funksiyası olacaq, burada qanuni və təsdiqlənmiş bizneslər təqdim olunacaq, onlar məhsul kataloqlarını nümayiş etdirə və maneəsiz ödənişləri qəbul edə biləcəklər.