Dubaydan internetlə mobil telefon sifariş verən soydaşlarımız Azərbaycanda bu cihazları götürərkən sözün həqiqi mənasında minbir əzab-əziyyət çəkirlər.
Bu barədə yeniavaz.com saytına çətinliklə üzləşən, gecə saat 12-dən səhərədək növbə gözləyən vətəndaşlardan biri məlumat verib.
Onun sözlərinə görə, Rabitə və İnformasiya Texnologiyaları Nazirliyinin Məlumat Hesablama Mərkəzindən (MHM) internetlə Dubaydan sifariş verib gətirilən telefonları götürərkən növbəyə əməl olunmaması, mobil telefon biznesi ilə məşğul olanların rüsum ödəməmək üçün dost-tanışlarını növbəyə salması biabırçı vəziyyət yaradıb.
"Açığı, mən vəziyyətin belə olduğunu bilmirdim, bilsəydim belədir, müraciət etməzdim. Bildiyiniz kimi, qiyməti 1000 dollaradək olan elektronik əşyalar gömrükdən keçirilərkən 36 faiz gömrük rüsumu tutulur. Mobil telefon ticarəti ilə məşğul olanlar bu pulu verməmək üçün əmioğlu, xalaoğlu, bibioğlu, dayıoğlu, qohum-qonşunu yığırlar ora və hərəsinin adına qiyməti 1000 dollaradək olan mobil telefonları rəsmiləşdirirlər.
Növbəni yaradan səbəblərdən biri budur. İkinci səbəb Dubaydan gətirilən mobil telefonların qeydiyyat məntəqələrinin sayının az olmasıdır. Cəmi 1 yerdir, 2-3 işçi ilə orada nə qədər sürətli iş görmək olar? 
Üçüncüsü isə vətəndaşlar tərəfindən nizam-intizama, sıraya əməl olunmamasıdır. Təsəvvür edin, mən sifariş verdiyim telefonu götürə bilmək üçün saat 12-dən səhərədək növbəyə durmuşam. Mənim kimilərinin sayı çox olduğundan başımızı qatmaq üçün səhərədək Rabitə və İnformasiya Texnologiyaları Nazirliyinin Məlumat Hesablama Mərkəzinin binası qarşısında domino oynamışıq ki, yuxumuz gəlməsin. Özümlə çay-çörək, maşında gözümüzün yuxusunu almaq üçün yorğan da gətirmişdim. 
Səhərədək qoymadıq ki, kimsə gəlib növbə cədvəlinə müdaxilə eləsin. Hansısa alverçi gəlib siyahıya 10 nəfərin, 15 nəfərin adını yaza bilmədi.
Səhər açılandan sonra vətəndaşları on-on buraxdılar içəri. 1 saat ərzində ən yaxşı halda 10 nəfəri yola salırdılar". 
Şikayətçi problemlə əlaqədar dünən Dövlət Gömrük Komitəsinin rəhbərliyinə də bununla əlaqədar məktub yazdığını bildirib: "Bu gün cavab gəldi ki, müraciətiniz qeydə alınıb. İnanaq ki, məsələ tezliklə həllini tapacaq, yoxsa belə biabırçılıq olmaz". 
Şahidi olduğunuz hadisələri çəkib bizə göndərin!
Son Əlavə