"Prius"la məktəblini vuran sürücü məhkəmə zalından azadlığa buraxıldı

Abşeron Rayon Məhkəməsində yol-nəqliyyat hadisəsi törətməkdə təqsirləndirilən Vəli Vəliyevin (şərti) cinayət işi üzrə məhkəmə istintaqı yekunlaşıb.

Pravda.az-ın əldə etdiyi məlumata görə, hakim Cəmilə Səfiyevanın sədrliyi ilə keçirilən prosesdə hökm oxunub.

Məhkəmənin hökmü ilə təqsirləndirilən şəxs zərərçəkmişlə barışdığına və ona dəymiş ziyanı tamamilə ödədiyinə görə Cinayət Məcəlləsinin 263-cü (Yol hərəkəti və nəqliyyat vasitələrinin istismarı qaydalarını pozma) maddəsinin "Qeyd" hissəsinə əsasən cinayət məsuliyyətindən azad edilib və onun həmin Məcəllənin 263.1-ci maddəsi ilə təqsirləndirilməsinə dair cinayət işi üzrə icraata xitam verilib. Vəli Vəliyev barəsində seçilmiş həbs qətimkan tədbiri ləğv olunub və o, məhkəmə iclas zalından dərhal azad edilib. Hökmdə qeyd edilib ki, iş üzrə maddi sübut kimi tanınmış "Toyota Prius" markalı avtomobilin sahibinə qaytarılması nəzərə alınsın.

İttihama görə, hadisə 2022-ci il tarixdə Abşeron rayonu, Saray qəsəbəsində qeydə alınıb.

Belə ki, 1999-cu il təvəllüdlü Vəli Vəliyev etibarnamə əsasında idarə etdiyi "Toyota Prius" markalı avtomobillə hərəkətdə olarkən yolu sağdan sola keçən piyada, zərərçəkmiş, 2011-ci il təvəllüdlü Valeh Səfərlini (şərti) vuraraq ona bədən xəsarəti yetirib. Daha sonra sürücü yaralını xəstəxanaya aparıb.

Hadisədən sonra Vəli Vəliyev saxlanılıb və barəsində həbs qətimkan tədbiri seçilib.