Dərman vasitələrinin qiymətinin artmasının səbəbi bu imiş – AÇIQLAMA

Azərbaycanda dərman və tibbi ləvazimatların satışına xərclənən vəsait artmaqda davam edir. Bu ilin yanvar-sentyabr aylarında pərakəndə ticarət şəbəkəsində əczaçılıq məhsulları və tibbi ləvazimatların satışı 1 milyard 386,4 milyon manat təşkil edib. Bu, ötən ilin müvafiq dövrü ilə müqayisədə 21,5 faiz artım deməkdir. Satış həcminin yüksəlməsi dərman preparatlarına tələbatın artması ilə yanaşı, qiymət dəyişiklikləri və əhalinin səhiyyə xərclərinin artması kimi amillərlə də bağlı ola bilər.

Azərbaycanda dərman və tibbi ləvazimatların satışına xərclənən vəsaitin bir il ərzində 21,5 faiz artmasını hansı iqtisadi amillərlə izah etmək olar?

Bu barədə iqtisadçı ekspert Rəşad Həsənov Median.Az-a açıqlamasında deyib ki, statistik məlumatların təhlili göstərir ki, 2026-cı ilin ötən dövründə tibbi ləvazimatların və dərman vasitələrinin idxalında qeydə alınan artım əsasən həmin məhsulların qiymətlərinin yüksəlməsi ilə bağlıdır:

“Rəsmi məlumatlara görə, müvafiq dövrdə əczaçılıq məhsullarının qiymətləri 35,7 faiz, tibbi ləvazimatların idxal qiymətləri isə 60 faiz artıb. Bu kontekstdə məsələyə yanaşdıqda, 2026-cı ilin ötən dövründə Azərbaycana idxal olunan dərman vasitələrinin, əczaçılıq məhsullarının və tibbi ləvazimatların real həcmində azalma qeydə alındığı qənaətinə gəlmək olar. Sadəcə, müvafiq sahədə qiymət artımları nəticəsində idxala nominal ifadədə daha çox vəsait yönəldilib. Qiymət artımına təsir göstərən amillər arasında geosiyasi vəziyyətlə əlaqədar nəqliyyat və logistika xərclərinin yüksəlməsidir. İstifadə olunan marşrutların yeniləri ilə əvəzlənməsi nəticəsində əlavə xərclərin yaranması, yanacağın bahalaşması, eləcə də istehsal və təchizat zəncirində xərclərin artması xüsusi yer tutur”.

Aysel