Sabirabadda yeniyetmə qıza sataşan şəxs həbs olunub.

Median.Az Lent.az-a istinadla xəbər verir ki, insident şəhərin Heydər Əliyev prospektində qeydə alınıb.

28 yaşlı Rüstəm Kərəmov (şərti adla) dayanacaqda 16 yaşlı qızdan əvvəlcə saatı soruşub, sonra isə əyləşdiyi yerini ona verib. İkinci gün də eyni hərəkəti edib, lakin bu dəfə qız onun yerində oturmayıb və davranışına etiraz edib.

Zərərçəkənin anasının sözlərinə görə, qızı oturmayanda Rüstəm ona "cəhənnəmə otur" deyib. Bundan sonra qız ağlaya-ağlaya evə gəlib. Anası da öz avtomobili ilə həmin dayanacağa gəlib və qızı Rüstəmi əli ilə göstərərək, həmin şəxsin onu narahat etdiyini bildirib. Qızın anası Rüstəmdən etdiyi hərəkətlərin səbəbini soruşanda o, sərxoş halda nalayiq ifadələr işlədib və heç nə etmədiyini deyib.

Bundan sonra qadın polisə müraciət edib. Şikayət əsasında R.Kərəmov saxlanılıb və barəsində xırda xuliqanlıq maddəsilə protokol tərtib olunub.

R. Kərəmov isə sadəcə olaraq, qıza dayanacaqda yer verdiyini bildirib. Onun sözlərinə görə, bu hərəkəti pis anlaşıldığı üçün qızın valideyni ilə mübahisə edib və polisə şikayət olunub.

Məhkəmə araşdırması zamanı Rüstəmin ictimai qaydanı pozduğu fakt təsdiqini tapıb.

Onun barəsində 8 gün müddətinə inzibati həbs qərarı verilib.скачать dle 11.3