“iPhone 18”in satışının ilk saatlarında Bakıda mağazaların qarşısında gecə saatlarından növbələrin yaranması diqqət çəkib. Minlərlə manatlıq smartfon üçün insanların gecə saatlarında saatlarla növbə gözləməsi sosial şəbəkələrdə də müzakirələrə səbəb olub.

Milli Məclisin deputatı Arzuxan Əlizadə Median.Az-a açıqlamasında bildirib ki, “iPhone 18”in satışının ilk saatlarında mağazaların qarşısında gecə saatlarından növbələrin yaranması, ilk baxışdan adi bir istehlak davranışı kimi görünsə də, əslində cəmiyyətdə formalaşan müəyyən sosial və istehlak meyilləri barədə düşünməyə əsas verir:

“İnsanların yeni texnologiyalara, xüsusilə də smartfonlara olan marağının artması təbiidir. Lakin minlərlə manat dəyərində cihazı ilk alanlardan olmaq üçün gecə saatlarından saatlarla növbə gözlənilməsi artıq təkcə texnologiyaya maraqla izah edilə bilməz. Burada yeniliyə sahib olmaq istəyi ilə yanaşı, sosial status, prestij və istehlak mədəniyyətinin də müəyyən rolu ola bilər. Ayrı-ayrı insanların bahalı smartfon almasına əsaslanaraq bütövlükdə cəmiyyətin maddi vəziyyəti və ya prioritetləri barədə ümumiləşdirilmiş nəticə çıxarmaq düzgün olmaz. Çünki insanların gəlirləri, xərcləri və şəxsi seçimləri fərqlidir. Kimsə üçün smartfon gündəlik həyat və iş fəaliyyətinin vacib alətidirsə, başqası üçün bu, daha çox şəxsi zövq və prestij məsələsidir”.

O qeyd eidb ki, əsas məsələ istehlak zamanı insanların öz maliyyə imkanlarını və digər zəruri ehtiyaclarını nəzərə almasıdır:
“Ümumilikdə isə belə görüntülər bizə istehlak mədəniyyəti ilə bağlı daha geniş düşünmək imkanı verir. Texnologiyanın sürətlə yeniləndiyi bir dövrdə hər yeni modelin əvvəlkindən daha üstün təqdim olunması insanlarda daim yenilənmək istəyi yaradır. Burada cəmiyyət olaraq əsas diqqətimizi nümayişkaranə istehlakdan daha çox maliyyə savadlılığına, rasional seçimə və gələcək üçün planlı xərcləməyə yönəltməliyik. Yeniliyə maraq normaldır, amma hər bir istehlak qərarı şəxsin real ehtiyacları və imkanları ilə uzlaşmalıdır”.

Ayselскачать dle 11.3