Azərbaycanda yeni avtomobillərə, xüsusilə Çin istehsalı modellərə marağın artması avtomobil bazarında seçim imkanlarını genişləndirib. Yeni avtomobillərin sayının çoxalması ikinci əl avtomobillərin qiymətlərinə də təsir göstərə biləcək amillərdən biri hesab olunur. Bazar iştirakçılarını qarşıdakı aylarda avtomobil qiymətlərində hansı dəyişikliklərin baş verəcəyi maraqlandırır. Bəs yeni avtomobillərin artması ikinci əl bazarında qiymətlərin ucuzlaşmasına səbəb ola bilərmi və yaxın dövrdə hansı qiymət tendensiyası gözlənilir?

Bu barədə avtomobil alqı-satqısı və icarəsi üzrə ekspert Sərxan Qədirov Median.Az-a açıqlamasında bildirib ki, son günlər Çin avtomobillərinin bazarda payı artır:

“Bir müddət Çin avtomobillərinə tələbat azalmışdı və bazar zəifləmişdi. Daha sonra belə bir məlumat yayıldı ki, bir ay sonra avtomobillərin qiyməti artacaq. Bundan sonra qiymətlər də müəyyən qədər yüksəldi. Bir ay ərzində Çin avtomobillərinə maraq artdı və insanlar əvvəlki qiymətlərlə avtomobil almağa başladılar. Bu da bazarın müəyyən qədər canlanmasına səbəb oldu. İkinci əl avtomobillərə gəlincə, hazırda onların alqı-satqısı yeni avtomobillərlə müqayisədə daha aktivdir. İkinci əl avtomobillərin qiymətlərində azalma deyil, əksinə, müəyyən artım müşahidə olunur”.
O qeyd edib ki, əvvəlki dövrlərlə müqayisədə qiymətlərin yüksəldiyini görmək mümkündür:
“Ümumilikdə, son bir ay ərzində avtomobil alqı-satqısında müəyyən canlanma müşahidə olunur. Əvvəlki dövrlə müqayisədə bazarda aktivlik bir qədər artıb. Yay aylarında insanlar əsasən istirahətdə, rayonlarda və digər bölgələrdə olurdular. Hazırda isə insanların şəhərə qayıtması, iş rejiminin bərpa olunması və məktəblərin açılması ilə şəhərdə hərəkətlilik artıb. Bununla əlaqədar avtomobil bazarı da tədricən canlanır və öz əvvəlki aktivliyini bərpa edir”.

Ayselскачать dle 11.3