Putinin qaz kəmərinin adını dəyişməsi Çində çaşqınlıq yaratdı

Rusiya Prezidenti Vladimir Putinin "Sibirin gücü 2" qaz kəmərinin adını "Baykalın gücü" olaraq dəyişdirmək qərarı bəzi Çin media orqanlarında çaşqınlıq yaradıb. Onlar bunun rəsmi Pekin üçün nəzərdə tutulan gizli bir mesaj ola biləcəyini ehtimal ediblər.

Bu barədə "Baijiahao" nəşri məlumat yayıb.

Rusiyanın bu addımı Putinin Şanxay Əməkdaşlıq Təşkilatının (ŞƏT) Bişkekdə keçirilən sammitində Çin Xalq Respublikasının sədri Si Cinpinlə danışıqlarından sonra məlum olub. Görüş zamanı ikitərəfli əməkdaşlıq əlaqələri və beynəlxalq vəziyyət müzakirə edilib.

Rusiyanın energetika naziri Sergey Tsivilyov Şərq İqtisadi Forumunda çıxışı zamanı bildirib ki, "Sibirin gücü 2" layihəsi məhz prezidentin təşəbbüsü ilə "Baykalın gücü" adlandırılıb. Qaz kəmərinin texniki göstəriciləri və marşrut xətti isə dəyişməz qalıb.

Çinli analitiklərin fikrincə, bu vəziyyətin siyasi izahı var: Rusiya bununla yalnız bir alıcıdan asılı olmadığını Pekinə nümayiş etdirmək istəyir. Qaz kəmərinin yeni adı onun ölkənin daxili ehtiyaclarını ödəmək imkanlarını ön plana çıxarır.

Lakin qeyd etmək lazımdır ki, məsələ ilə bağlı hər hansı rəsmi açıqlama verilməyib. Həmçinin Putinin qaz kəmərinin adını nəyə görə dəyişdirmək qərarına gəldiyi barədə heç bir izahat yoxdur.