Rusiyada güclü zəlzələ oldu

Rusiyanın Buryatiya Respublikasının Tunkin rayonunda 6.7 maqnitudalı zəlzələ qeydə alınıb.

Bu barədə Rusiya Fövqəladə Hallar Nazirliyinin (FHN) regional baş idarəsindən məlumat verilib.

Yeraltı təkanlar Bakı vaxtı ilə saat 06:18-də baş verib. Zəlzələnin episentri Kıren yaşayış məntəqəsindən 7.6 kilometr şimal-qərbdə, Arşan qəsəbəsindən isə 34 kilometr aralıda yerləşib.

Rusiya Elmlər Akademiyasının Vahid Geofizika Xidmətinin məlumatına əsasən, İrkutsk, Anqarsk, Şelexov, Slyudyanka və digər bir sıra yaşayış məntəqələrində zəlzələ 3 bal gücündə hiss olunub. Tunkin rayonunun özündə yerli sakinlər zəif təkanlar hiss ediblər.

FHN-in xüsusi qrupları tərəfindən binaların, sosial əhəmiyyətli və infrastruktur obyektlərinin vəziyyətinin yoxlanılması işləri təşkil olunub.