Yay mövsümündə ən çox istehlak edilən qidalardan biri də dondurmadır. Həm sərinləndirici təsiri, həm də xoş dadı səbəbindən hər yaş qrupundan olan insanlar tərəfindən sevilən dondurma düzgün seçildikdə və normada istehlak edildikdə qidalanmanın bir hissəsi ola bilər.

Bununla belə, mütəxəssislər həddindən artıq dondurma qəbulunun sağlamlıq üçün müəyyən risklər yarada biləcəyini bildirirlər.

Dondurma süd və süd məhsullarından hazırlandığı üçün tərkibində kalsium, zülal və bəzi vitaminlər olur. Bu maddələr sümük və diş sağlamlığının qorunmasına, orqanizmin gündəlik qida ehtiyacının müəyyən hissəsinin ödənilməsinə kömək edir.

Lakin əksər sənaye üsulu ilə hazırlanan dondurmaların tərkibində yüksək miqdarda şəkər və doymuş yağ olur. Mütəmadi və normadan artıq istehlak isə çəki artımı, piylənmə, qan şəkərinin yüksəlməsi və ürək-damar xəstəlikləri riskini artıra bilər. Xüsusilə şəkərli diabeti, piylənməsi və ya ürək-damar problemləri olan şəxslər dondurma seçərkən daha diqqətli olmalıdırlar.

Mütəxəssislər dondurma alarkən məhsulun saxlanma şəraitinə və son istifadə tarixinə diqqət yetirməyi tövsiyə edirlər. Əridikdən sonra yenidən dondurulan məhsullar bakteriyaların çoxalması üçün əlverişli mühit yarada bilər və qida zəhərlənməsi riskini artırar.

Bəzi insanlar dondurmanın boğaz ağrısı və ya soyuqdəyməyə səbəb olduğunu düşünsələr də, həkimlər bildirirlər ki, sağlam insanlarda dondurmanın təkbaşına virus infeksiyası yaratması mümkün deyil. Lakin çox soyuq qidalar həssas insanlarda boğazda qıcıqlanma və narahatlıq hissi yarada bilər.

Dietoloqlar dondurmanı əsas qida kimi deyil, desert kimi qəbul etməyi, porsiya ölçüsünə nəzarət etməyi və mümkün olduqda şəkəri az, təbii tərkibli məhsullara üstünlük verməyi məsləhət görürlər. Meyvə əsaslı və ya şəkəri az olan alternativlər daha sağlam seçim hesab edilir.
//azxeber.comскачать dle 11.3