Xocəsən gölü daşdı: Evlər və həyətlər su altında qaldı - Video

Gölün daşması nəticəsində həyətləri su basıb, ərazidə isə antisanitar vəziyyət yaranıb.

Median.Az "Xəzər" TV-yə istinadən xəbər verir ki, paytaxtın Binəqədi rayonu, Xocəsən qəsəbəsində yerləşən Xocəsən gölünün su səviyyəsi artaraq daşma həddinə çatıb. Nəticədə gölün ətrafında yerləşən bir sıra evlər və həyətlər su altında qalıb.

Sakinlərin iddiasına görə, Xocəsən gölündə suyun normal axınına maneələr yarandığından yağış suları göldə toplanır və onun səviyyəsinin yüksəlməsinə səbəb olur.

Məsələ ilə bağlı Xocəsən Bələdiyyəsindən bildirilib ki, göldə suyun səviyyəsinin artmasının əsas səbəbi Lökbatan gölü istiqamətində uzanan axın xəttinin ötürücülük qabiliyyətinin kifayət qədər olmamasıdır. Nəticədə su tam şəkildə kənarlaşdırıla bilmir.

Qeyd olunub ki, problemin köklü həlli məqsədilə Azərbaycan Dövlət Su Ehtiyatları Agentliyinin müvafiq qurumları tərəfindən Şıxov istiqamətində yeraltı tunel vasitəsilə kanalizasiya xətti çəkilir. Bundan əlavə, Sahil qəsəbəsi ərazisində təmizləyici qurğunun inşası davam etdirilir. Layihə çərçivəsində Xocəsən gölü və Lökbatan gölündəki çirkab sular təmizləndikdən sonra Xəzər dənizinə axıdılacaq.

Bələdiyyədən həmçinin bildirilib ki, Xocəsən ərazisində aparılan tikinti işlərinin göldə yaranmış vəziyyətlə hər hansı əlaqəsi yoxdur.