Qurban bayramı Azərbaycanda yalnız dini mərasim kimi deyil, həm də ailə və cəmiyyət ənənələrinin mühüm hissəsi kimi dəyərləndirilir. Bir çox ailələrdə nişanlı qıza qurban payı göndərilməsi və ya ailə qurmağa hazırlaşan gənclər üçün qurban kəsilməsi uzun illərdir davam edən adətlər sırasında yer alır. Bununla yanaşı, bu ənənələrin dini baxımdan nə dərəcədə vacib olması ilə bağlı cəmiyyətdə fərqli fikirlər mövcuddur. Bəs İslam dinində nişanlı qıza qurban aparılması və bu kimi adətlərə münasibət necədir?

Mövzu ilə bağlı Median.Az-a açıqlama verən ilahiyyatçı Tural İrfan bildirib ki, Qurban bayramında kəsilən qurban sırf Allah üçündür. Yəni nəzir qurbanı, əhd qurbanı ayrı zamanda kəsilməli və ətinin də demək olar ki, hamısı kasıblara paylanmalıdır.


Onun sözlərinə görə, oğul, qız, gəlin üçün, yəni onların adından Allaha qurban kəsmək olar:

“Lakin bu qurban bayram qurbanından fərqlidir. Niyyət qurbanıdır. Bayram qurbanı ilahi məsuliyyət və mükəlləfiyyətdən doğan vacib ibadətdir. İmkanı çatan hər kəs kəsməlidir. Nişanlı qızlar üçün aparılan qurban müstəhəb qurbandır. Onu qurban bayramının qurbanı ilə qarışdırmaq olmaz. Yaxud qurban payı göndərilir ki, bu da normaldır”.

T.İrfan qeyd edib ki, Qurban bayramında yaxud digər vaxtlarda kəsilən qurbanın payını bölüşdürərkən qohumlara da təqdim olunması tövsiyələrdəndir:

“İslam dinində yalnız maddi imkanı çatan şəxslərin qurban bayramında müvafiq heyvan kəsməsi vacibdir. Bir də nəzir etdiyi qurbanı kəsməsi vacibdir, çünki boynunda haqdır, söz verdiyi üçün. Həmin qurbanları kəsərkən lazım bildirilən şəxslərə pay verməsi də təbiidir. Toy zamanı, yaxud nişanlı qız üçün kəsilən qurbanlar dinə yox, adətə əsaslanır”.скачать dle 11.3