Avtomobilin üzərindəki kiçik batıq bəzən detalın rənglənməsi, hətta dəyişdirilməsi ilə nəticələnir. Amma boya qopmayıbsa, bir çox hallarda həmin əzikləri rənglənmədən düzəltmək mümkündür.

Median.Az Xəzər Tv-yə istinadən xəbər verir ki, sürücülər arasında "bezkraska" kimi tanınan bu üsul avtomobilin zavod boyasını qorumağa imkan verir. Qiymət isə zədənin yerindən, dərinliyindən və işin çətinliyindən asılı olaraq dəyişir.

Bu işin əsas məqsədi avtomobildəki əzik və batıqları rəngsiz düzəltməkdir. Yəni detalın üzərinə üzlük vurulmur, əlavə boya çəkilmir.

Bu üsul xüsusilə avtomobilini zavod boyasında saxlamaq istəyənlər üçün önəmlidir. Çünki rənglənmiş detal sonradan maşının satış qiymətinə də təsir edə bilər. Ona görə boya qopmayıbsa və metal ciddi zədələnməyibsə, bir çox sürücü əvvəlcə rəngsiz əzik düzəltmə ustasına müraciət edir.

Rəngsiz bərpa təkcə bir-iki batığa aid deyil. Dolu nəticəsində yaranan çoxsaylı zədələr də bu üsulla düzəldilə bilər.

Ustalar bu işi xüsusi avadanlıqlarla görürlər. Bəzi batıqlar arxadan itələnir, bəziləri isə səthə zərər vermədən dartılır.

Amma hər əziyi rəngsiz düzəltmək mümkün deyil. Boya qopubsa, metal kəskin bükülübsə və ya detal əvvəl rənglənibsə, nəticə istənilən kimi alınmaya bilər. Buna görə zədə əvvəlcə usta tərəfindən yoxlanılmalı, sonra uyğun təmir üsulu seçilməlidir.

Usta Taryel Babayev deyib ki, sözügedən prosesin icra edilməsi 20-1000 manat arasında dəyişir.
скачать dle 11.3