İki qitəni əhatə edən və Qərb yarımkürəsinin demək olar ki, bütün uzunluğu boyunca uzanan Panamerikan şosesi indiyədək inşa edilmiş ən uzun avtomobil yollarından biri hesab olunur.
 
Bu barədə "Daily Express" yazır.

Qeyd olunur ki, nəqliyyat şəbəkələri sahəsində az rast gəlinən miqyasda 14 ölkəni birləşdirən bu yol Ginnesin Rekordlar Kitabı tərəfindən dünyanın ən uzun avtomobil yolu kimi tanınıb.

"Panamerikan şosesi fasiləsiz, tək bir asfalt zolağı deyil. Əksinə, bu, onilliklər ərzində bir-biri ilə əlaqələndirilmiş milli avtomagistralların böyük şəbəkəsidir. Yol ABŞ-ın Alyaska ştatındakı Prudho-Beydən Argentinanın çox vaxt dünyanın ən cənub şəhəri adlandırılan Uşuayyasına qədər uzanır”, deyə məqalədə qeyd edilir.

Bildirilir ki, bu nəhəng marşrutun ümumi uzunluğu təxminən 30 min kilometrdir. Müxtəlif yanaşmalara görə, avtomagistral 14 ölkədən keçir (bəzən şimal şəbəkəsinə Kanada da daxil edildikdə 15 ölkə göstərilir):

ABŞ
Meksika
Qvatemala
Salvador
Honduras
Nikaraqua
Kosta-Rika
Panama
Kolumbiya
Ekvador
Peru
Çili
Argentina

Yol boyu səhralar, tropik meşələr, dağ silsilələri, şəhərlər və ucqar vəhşi təbiət guşələri yerləşir.

Maraqlıdır ki, bütün uzunluğuna baxmayaraq, Panamerikan avtomagistralında məşhur bir boşluq mövcuddur. Bu, Panama ilə Kolumbiya arasında yerləşən, təxminən 160 kilometrlik cəngəllik ərazisi olan Darien boşluğudur. Bu, marşrut üzrə yeganə tamamlanmamış hissədir və ekoloji və təhlükəsizlik səbəblərinə görə yol burada indiyədək tikilməyib.

Vurğulanır ki, sıx tropik meşələr, bataqlıqlar, dağlıq ərazilər və zəif infrastruktur səbəbindən bu ərazi qaçaqmalçılıq marşrutları və silahlı qruplaşmalarla da tanınır. Panamerikan şosesinin bütün marşrutu üzrə səyahət etmək istəyənlər Mərkəzi Amerika ilə Cənubi Amerika arasında nəqliyyat vasitələrini qayıq və ya təyyarə ilə daşımalı olurlar. Məqalədə qeyd olunur:

"Nəzəri olaraq, Panamerikan avtomagistralı ilə uzun fasilələrsiz səyahət iki-üç ay çəkə bilər. Lakin bu marşrutu qət etməyə çalışan insanların əksəriyyəti daha çox vaxt sərf edir”.

Bir çox səyahətçi bu yol üçün altı aydan bir ilə qədər vaxt ayırır, digərləri isə səfəri bir-iki ilə qədər uzadır. Bu marşrutla motosikletçilər, velosipedçilər və hətta qaçışçılar da hərəkət ediblər.

Panamerikan avtomagistralının tarixi

Maraqlıdır ki, Amerikanı birləşdirən vahid yol ideyası ilk dəfə 1923-cü ildə Amerika dövlətlərinin Beşinci beynəlxalq konfransında irəli sürülüb. Lakin hər bir ölkə öz ərazisindəki hissələri müxtəlif vaxtlarda və çox zaman fərqli standartlarla inşa edib və yeniləyib.

Əsas tikinti işləri 1930–1970-ci illər arasında aparılıb. Bununla belə, bəzi yol hissələri bundan xeyli əvvəl mövcud idi və bir çox sahələr bu gün də modernləşdirilməkdədir. Bu səbəbdən Panamerikan şosesinin tikintisinin yekunlaşdığı vahid tarix yoxdur.

Şosenin xüsusilə Şimali Amerikadakı böyük hissələri tam asfaltlanıb və müasir avtomagistralları xatırladır. Digər bölgələrdə isə şərait kəskin şəkildə fərqlənir: Mərkəzi və Cənubi Amerikanın bəzi ərazilərində yollar zəif saxlanılır və yağış mövsümündə bəzən keçilməz olur.

And dağlarında yolun hündürlüyü 4000 metrdən yuxarı qalxır ki, bu da yüksəklik və hava şəraitini sürücülər üçün əlavə çətinliklərə çevirir.
//qaynar.azскачать dle 11.3