"Tütün və tütün məmulatı haqqında" qanuna ediləcək dəyişikliklə Azərbaycanda elektron siqaretlərin və onların komponentlərinin idxalı, ixracı, istehsalı, saxlanılması, topdan və pərakəndə satışı və istifadəsi qadağan olunacağı gözlənilir.

Milli Məclisin komitə iclasında çıxış edən deputat Azər Əmiraslanov bildirib ki, ilin ilk 11 ayı ərzində 20 milyon manat dəyərində elektron siqaret ölkəyə gətirilib: "İlin sonuna qədər bu rəqəm arta bilər".

Oxu.Az-ın rəsmi statistik rəqəmlər üzərində apardığı araşdırmalar zamanı məlum oldu ki, 2025-ci ilin yanvar-oktyabr aylarında ölkəyə ümumilikdə 77 min 570 ədəd elektron siqaret və analoji qurğu idxal olunub. Bu məhsulların idxal dəyəri 16 milyon 550 min dollardan çox olub.

Ən çox idxal Malayziyadan həyata keçirilib. Belə ki, bu ölkədən Azərbaycana 30 min 680 ədəd elektron siqaret gətirilib və idxalın dəyəri 11 milyon 440 min dollar olub. İdxalda növbəti yerləri İndoneziya (24 min 960 ədəd), Çin (20 min 891 ədəd) tutur. Rusiyadan 1026 ədəd və BƏƏ-dən 13 ədəd elektron siqaret idxal edilib.

Gömrük statistikasına görə, eyni dövrdə Azərbaycandan 222 ədəd elektron siqaret və analoji qurğu ixrac edilib. İxracın ümumi dəyəri 4 min 240 dollar təşkil edib.скачать dle 11.3