Dövlət hakimiyyətinə qarşı ağır cinayətlərdə ittiham olunan Ramiz Mehdiyevin ətrafında gedən proseslər son aylarda daha da kəskinləşib. Prezident Administrasiyasına rəhbərlik etdiyi dövrdə böyük təsir imkanlarına sahib olan Mehdiyev və ona yaxın olduğu iddia edilən bir sıra şəxslərin dövlətə xəyanətdə ittiham olunması ictimai müzakirələri genişləndirib.

İttihamların dairəsi deputatlardan tutmuş, 20 ildən artıqdır siyasi və ictimai həyatda aktiv olan fiqurlara qədər uzandığı üçün mövzu cəmiyyətin diqqətini daha da cəlb edir.

Bu kontekstdə ölkənin dini lideri, Qafqaz Müsəlmanları İdarəsinin rəhbəri Allahşükür Paşazadənin Ramiz Mehdiyevlə münasibətlərinin necə olub-olmaması da sual doğuran məqamlardandır.

Median.Az xəbər verir ki, Allahşükür Paşazadənin qardaşı, deputat Cavanşir Paşazadə Modern.az-a açıqlamasında bu məsələyə də aydınlıq gətirib.

Cavanşir Paşazadə bildirib ki, onun Ramiz Mehdiyevlə əlaqəsi heç bir halda olmayıb.

"Heç vaxt görüşməmişik də. Allahşükür Paşazadə isə şeyxülislam olub. Hər ikisi müəyyən vəzifələr yerinə yetiriblər. Ola bilsin ki, münasibətləri olub. Amma bu münasibətlər dövlətlə bağlı məsələlərin müzakirəsi kontekstində ola bilər. Başqa mövzu ola bilməz", - deyə şeyxin qardaşı vurğulayıb.
скачать dle 11.3