Kişi evə gec gələn arvadını döyərək məhkəməlik oldu

Abşeron Rayon Məhkəməsində qəsdən sağlamlığa az ağır zərər vurmada təqsirləndirilən İmamverdi Əsədovun (adı və soyadı şərtidir) cinayət işi üzrə məhkəmə istintaqı yekunlaşıb.

Median.Az Pravda.az-a istinadən xəbər verir ki, hakim Abusət Qasımovun sədrliyi ilə keçirilən prosesdə hökm oxunub.

Məhkəmənin hökmü ilə İmamverdi Əsədovun cinayət əməlini törətməsinə dair məhkəməyədək sadələşdirilmiş icraat materialına xitam verilib və təqsirləndirilən şəxs cinayət məsuliyyətindən azad edilib.

İttihama görə, hadisə 2025-ci il oktyabrın 8-də, gecə saat 23 radələrində Abşeron rayonu, Xırdalan şəhərində qeydə alınıb.

Belə ki, İmamverdi Əsədov ailə üzvləri ilə birlikdə yaşadığı evdə arvadı, zərərçəkmiş İnarə Əsədova (adı və soyadı şərtidir) ilə mübahisə edib. Buna səbəb isə qadının boşanmaq niyyəti və evə gec gəlməsi olub. O, ailə-məişət münasibətləri zəminində yaranmış narazılıqla bağlı mübahisə etdikləri zaman arvadının üzərinə hücum edib.

Təqsirləndirilən şəxs bu zaman qəsdən əl və yumruq zərbələri ilə İnarənin sifət, baş, qol və bədənin müxtəlif nahiyələrinə ardıcıl zərbələr endirərək ona bədən xəsarətləri yetirib.

Hadisədən sonra İmamverdi Əsədov saxlanılaraq cinayət məsuliyyətinə cəlb edilib.