Ermənistan XİN: "Azərbaycanla nəqliyyat əlaqələrinin bərpası bizim marağımızdadır"

"Ermənistan Azərbaycanla nəqliyyat əlaqələrinin qurulması, açılması və bərpası prosesinin tezləşdirilməsində olduqca maraqlıdır".

Bu barədə Ermənistanın xarici işlər naziri Ararat Mirzoyan Polşanın "TVP World" kanalına müsahibəsində bildirib.

"Dəmiryolu əlaqələrinə gəldikdə, ekspertlərin qiymətləndirmələrinə görə, onun tikintisi azı iki il çəkə bilər. Lakin biz artıq Azərbaycanın infrastrukturundan və ərazisindən istifadə edərək yükdaşımaları həyata keçirə bilərik", - deyə Mirzoyan vurğulayıb.

O, Azərbaycanla sülh sazişi mətninin artıq paraflandığını xatırladıb və bildirib ki, Ermənistan tərəfi bu sazişi mümkün qədər tez imzalamağa hazırdır. Bununla belə o, hər iki tərəfdən insanların münasibətlərdə hələ də müəyyən ehtiyatlılıq nümayiş etdirdiklərini vurğulayıb.

"Barışıq prosesi vaxt aparacaq. Sülh qurulub, lakin o, hər iki tərəfdən daimi qayğı və gündəlik səylər tələb edir", - deyə Mirzoyan bəyan edib.