Bakı Apellyasiya Məhkəməsində dələduzluqda təqsirləndirilən, əslən azərbaycanlı kriminal avtoritet Oleq Andreyeviç Krapivin (Oleq Bakinski) və Ukrayna müdafiə sənayesi nazirinin Avrasiya məsələləri üzrə sabiq müavini Konstantin Antonoviç Kuçerin barəsində olan hökmdən verilmiş apellyasiya şikayətinə baxılıb.

Hakim Murad Məmmədovun sədrliyi ilə keçirilən prosesdə çıxış edən Konstantin Kuçerin vəkili Elşad Əliyev bildirib ki, müvəkkilinə verilən dələduzluq ittihamı birinci instansiya məhkəməsi tərəfindən sübuta yetirilməyib: "Silahdan istifadə etməklə xuliqanlıq cinayəti isə istintaqın uydurmasıdır. Məhkəmədən xahiş edirəm ki, Konstantin Kuçer barəsində bəraət hökmü çıxarsın".

Prosesdə çıxış edən Oleq Bakinskinin vəkil Xeyrənsə Babayeva isə deyib ki, müvəkkili ona verilən cəza ilə razı deyil. O bildirib ki, Oleq Bakinskiyə bəraət verilməlidir.

Məhkəmədə çıxış edən Oleq Bakinski şərləndiyini vurğulayıb: "Mən heç bir cinayət törətməmişəm. Mənim üstümə böhtan atılıb, xahiş edirəm mənə bəraət verəsiniz".

Proses sentyabrın 18-də davam edəcək.

Xatırladaq ki, Bakı Ağır Cinayətlər Məhkəməsinin hökmü ilə Oleq Bakinskiyə 2 il 6 ay şərti cəza verilib. Digər təqsirləndirilən Konstantin Kuçer isə 2 il 6 ay azadlıqdan məhrum edilib.

Qeyd edək ki, təqsirləndirilən şəxslər Rusiya Federal Təhlükəsizlik Xidmətinin əməkdaşı Valeri Zaxarenkoya Bakıda xəsarət yetirməkdə və ona qarşı dələduzluqda ittiham olunublar.

Eyni zamanda, iş üzrə "Aviazapçast" ASC və "Promışlennie Postavki Kazaxstan" MMC zərərçəkmiş qismində tanınıblar.
//oxu.azскачать dle 11.3