"ChatGPT" istifadəçilərinə fasilə verməyi xatırladacaq

Hazırda dünyanın ən populyar tətbiqlərindən biri olan “ChatGPT” məktəbdən iş həyatına qədər müxtəlif sahələrdə istifadə olunur. Lakin texnologiyadan düzgün və balanslı istifadə etməyin vacibliyi də dəfələrlə vurğulanıb.

Valyuta.az xəbər verir ki, “OpenAI” şirkəti süni intellekt əsaslı platforması olan “ChatGPT”yə uzun müddətli və intensiv istifadəyə qarşı yönəlmiş yeni funksionallıq əlavə edib.

Yeni xüsusiyyət sosial media platformalarının təhlükəsizlik tədbirlərinə bənzəyir. Məsələn, istifadəçi uzun müddət fasiləsiz şəkildə platformada aktiv olduqda sistem tərəfindən belə bir mesaj göndəriləcək: “Bir müddətdir söhbətdəsiniz. Fasilə vermək üçün yaxşı bir zaman ola bilərmi?”

Bu funksiya süni intellektlə uzun saatlar keçirən istifadəçilərin sağlam balansı qorumasına yardım etməyi hədəfləyir. Qeyd olunub ki, fasilə vermək məcburi deyil – istifadəçi istəsə davam edə bilər.

Bundan əlavə, “OpenAI” bəzi həssas mövzularda cavabların daha neytral və düşünməyə təşviq edən şəkildə təqdim olunacağını da bildirib. Məsələn, istifadəçi şəxsi münasibətlərinə dair qəti qərar soruşduqda ChatGPT artıq birmənalı “bəli” və ya “xeyr” cavabı verməyəcək, əvəzində düşünməyə və qərarı özü verməyə yönəldən cavablar təqdim edəcək.