"Azərbaycan tərəfi Aktau yaxınlığında "Azərbaycan Hava Yolları" QSC-yə məxsus "Embraer 190" sərnişin təyyarəsinin qəzaya uğraması ilə bağlı beynəlxalq məhkəmə instansiyalarına təqdim etmək üçün sənədlər hazırlayır".
Bu barədə Azərbaycan Prezidenti İlham Əliyev III Şuşa Qlobal Media Forumunun iştirakçıları ilə görüşündə deyib.
"Artıq Rusiya tərəfini məlumatlandırmışıq ki, bu məsələ ilə bağlı beynəlxalq məhkəmə instansiyalarına təqdim etmək üçün sənədlər hazırlayırıq. Başa düşürük ki, bu vaxt apara bilər. Malayziya aviaşirkətinə məxsus "Boeing" təyyarəsi işində bu on ildən çox çəkdi. Biz on il gözləməyə hazırıq, amma ədalət zəfər çalmalıdır", - deyə dövlət başçısı qeyd edib.
O vurğulayıb ki, hadisədən yeddi ay keçməsinə baxmayaraq, Azərbaycan bu məsələ ilə bağlı Rusiya rəsmilərindən heç bir cavab almayıb.
"Bizim xahiş və tələblərimiz tamamilə məntiqlidir: qəzanın baş verməsində günahı etiraf etmək, təyyarəni vuran şəxsləri cəzalandırmaq, həlak olanların ailələrinə, zərərçəkənlərə və AZAL-a itirilmiş təyyarəyə görə kompensasiya ödənilməsini təmin etmək", - Prezident İlham Əliyev bildirib.
Şahidi olduğunuz hadisələri çəkib bizə göndərin!
Son Əlavə