Baku TV-nin qaynar xəttinə vətəndaşdan şikayət daxil olub.
Şikayətdə iddia olunur ki, paytaxtın Abşeron rayonu ərazisində yerləşən "Türkmed" klinikasında özünü travmatoloq kimi təqdim edən Əhməd Əhmədzadə adlı həkim işləyir, lakin onun bu sahə üzrə heç bir təhsili yoxdur.
Həqiqəti aşkarlamaq üçün Baku TV-nin əməkdaşı sözügedən klinikada olub.
Əhməd Əhmədzadə travmatologiya üzrə rezidentura təhsilini xaricdəki universitetlərdən birində onlayn formada aldığını söyləyib. O, onlayn təhsil almağına dair diplomunun "MedEra Hospital"da olduğunu bildirib.
"MedEra" hospitalın baş direktoru İbrahim Əliyev isə Əhməd Əhmədzadənin adıçəkilən klinikada həkim kimi çalışmadığını deyib: "O, bu klinikada əməliyyat zamanı travmatoloqun yanında yalnız köməkçi kimi iştirak edir".
Qeyd edək ki, Əhməd Əhmədzadə Türkiyənin Artvin Çoruh Universitetində yalnız tibb qardaşı ixtisası üzrə təhsil alıb. Travmatologiya üzrə isə təhsili yoxdur.
Məsələ ilə bağlı Səhiyyə Nazirliyindən bildirilib ki, praktik tibb fəaliyyəti ilə məşğul olmaq hüququ olan həkimlər və orta tibb işçiləri arasında Əhməd Cəmasəddin oğlu Əhmədzadənin adı yoxdur: "Göstərilən faktla əlaqədar Analitik Ekspertiza Mərkəzində işçi qrupu tərəfindən ciddi araşdırma aparılacaq və nəticələri barədə ictimaiyyətə məlumat veriləcək".
Şahidi olduğunuz hadisələri çəkib bizə göndərin!
Son Əlavə