WhatsApp işlədənlərə ŞAD XƏBƏR - Çoxdan gözlənilən funksiya işə düşüb

Populyar mesajlaşma platforması WhatsApp-da uzun müddətdir gözlənilən Message Summaries (Mesaj xülasələri) adlı yeni funksiya istifadəyə verilib. Bu barədə şirkətin rəsmi bloqunda məlumat verilib.

Yeni alət süni intellekt (Sİ) texnologiyası əsasında işləyir və istifadəçilərə çoxsaylı çatlarda oxunmamış mesajlara qayıtdıqda vaxt qənaəti etməyə kömək edir. Sistem oxunmamış mesajların qısa xülasəsini avtomatik şəkildə tərtib edir və istifadəçilərin hər bir mesajı ayrı-ayrılıqda oxumasına ehtiyac qalmır.

Bu texnologiya Meta AI modelinin imkanları ilə Private Processing sistemi birləşdirilərək hazırlanıb və bu da tam məxfilik təmin edir.

Hazırlayıcılar məxfilik məsələlərinə xüsusi önəm veriblər: xülasələr istifadəçinin cihazında lokal olaraq yaradılır, məlumatlar nə Meta, nə də WhatsApp-ın serverlərinə ötürülmür. Eyni zamanda, çat iştirakçıları da bu xülasələrə çıxış əldə etmir.

Yeni funksiyanı aktiv etmək üçün istifadəçilər tətbiqin ayarlarına daxil olaraq "Advanced chat privacy" bölməsindən onu ayrıca aktiv etməlidirlər. Burada istifadəçi istədiyi çatları seçərək Sİ alətinin tətbiq olunmasını təmin edə bilər.