Süni intellekt sahəsində inqilabi nailiyyətlərə imza atan "OpenAI" bu dəfə tamamilə yeni bir cihaz kateqoriyası yaratmağa hazırlaşır.
Qaynarinfo xəbər verir ki, bu dəfə hədəf nə ağıllı eynək, nə də geyilə bilən texnologiyadır.
"OpenAI" şirkətinin baş direktoru Sem Altman işçilərinə etdiyi açıqlamada, növbəti böyük məhsulun ekranı olmayan, olduqca kompakt və ətraf mühiti dərk edə bilən bir cihaz olacağını bildirib. Bu cihaz masa üzərində dayana biləcək qədər kiçik və ya cibə yerləşəcək qədər daşına bilən olacaq.
Sem Altman bu texnologiyanı "iPhone" və "MacBook Pro" ilə yanaşı, gündəlik həyatın ayrılmaz hissəsi olacaq üçüncü əsas cihaz kimi təsvir edir və onu "süni intellekt yardımçısı” kimi təqdim edir.
Bu iddialı layihənin arxasında diqqətçəkən bir əməkdaşlıq dayanır. "OpenAI", keçmiş "Apple" dizayneri Coni Ayv tərəfindən yaradılmış və ötən il təsis olunmuş "io" adlı startapı 6,5 milyard dollarlıq səhmlərlə satın aldığını elan edib. Ayv "Apple"da çalışdığı dövrdə "iPhone", "iMac" və "iPad" kimi inqilabi məhsulların dizaynında əsas rol oynamışdı. Artıq o, "OpenAI" çərçivəsində bu yeni cihazın dizaynına rəhbərlik edəcək.
Altmanın açıqlamasına görə, bu satınalma "OpenAI"a potensial olaraq 1 trilyon dollarlıq bazar dəyəri qazandıra bilər. Çünki hazırlanan cihaz, indiyədək mövcud olan əl cihazları, ağıllı eynəklər və geyilə bilən texnologiyalardan tamamilə fərqli olub, yeni bir texnoloji kateqoriyanı formalaşdıracaq.
Altman layihənin rəqiblər tərəfindən kopyalanmaması üçün məxfilik məsələsinin həyati əhəmiyyət daşıdığını vurğulasa da, onun açıqlamasının qeydləri sızıb. Bu hadisə şirkət daxilində etibar problemlərinə səbəb ola və Altmanın gələcəkdə komandaya qarşı nə dərəcədə açıq olacağı ilə bağlı suallar doğura bilər.
Şahidi olduğunuz hadisələri çəkib bizə göndərin!
Son Əlavə