"Geomaqnit qasırğaları ürək-damar və sinir sistemi xəstəlikləri olan insanlar üçün təhlükəlidir".

Median.Az-ın News.ru-ya istinadla verdiyi məlumata görə, bu barədə rusiyalı terapevt Anastasiya Lozikova xəbərdarlıq edib.

Onun sözlərinə görə, Günəşdə partlayışlar zamanı həssas əhali qrupları ciddi sağlamlıq problemləri yaşaya bilərlər.

"Başağrıları, arterial təzyiqin dəyişməsi, yuxu pozğunluqları - bunlar maqnit fırtınaları zamanı insanlarda yarana biləcək simptomlardan yalnız bir neçəsidir. Xüsusilə hipertoniya, hipotoniya, aritmiya, miqren və xroniki başağrıları olan xəstələr belə dövrləri çətin keçirirlər. Ayaqlarda zəiflik, yorğunluq, yuxululuq və ya yuxusuzluq, diqqət və yaddaşın pisləşməsi - bütün bunlar Günəş partlayışlarının insan orqanizminə təsirindən xəbər verə bilər", - deyə Lozikova izah edib.

Həkim vurğulayıb ki, yaşlı insanlar risk qrupundadırlar, çünki yaş artdıqca damar sistemi Yerin maqnit fonundakı dəyişikliklərə daha həssas olur.

Bundan əlavə, hamilə qadınlar da geomaqnit həyəcanları dövründə diqqətli olmalıdırlar.

Anastasiya Lozikova həssas əhali kateqoriyalarına geomaqnit aktivlik proqnozlarını izləməyi və həddindən artıq yüklənmədən qaçaraq, orqanizmə istirahət verməyi tövsiyə edib.

O, daha çox su içməyi, qəhvə və alkoqol qəbulunu məhdudlaşdırmağı, təmiz havada daha çox vaxt keçirməyi, kölgədə gəzməyi və xüsusilə axşam saatlarında ekranlarla iş vaxtını azaltmağı məsləhət görüb.

"Geomaqnit qasırğalarının aktivlik piki aprelin 24-nə gözlənilir. Vəziyyət yalnız aprelin 29-na qədər tam sakitləşəcək", - deyə terapevt yekunlaşdırıb.

Bu dövrdə arterial təzyiqə nəzarət etmək və lazım gəldikdə müalicə həkimi ilə məsləhətləşdikdən sonra dərman dozasını tənzimləmək xüsusilə vacibdir.скачать dle 11.3