Azərbaycanda 5 bağlanmış bankın əmlakları hərraca çıxarılır

Mayın 7-də "Bakı Hərrac Mərkəzi" MMC-də ləğv prosesindəki “Zamin Bank”, “Atra Bank”, “Yunayted Kredit Bank” və “Atabank” ASC-lərin, eləcə də “Bank Standard” QSC-nin daşınmaz əmlaklarının satışı üzrə açıq hərraclar keçiriləcək.

Bu barədə bankların ləğvedicisi - Əmanətlərin Sığortalanması Fondu məlumat yayıb.

Söhbət “Zamin Bank”a məxsus Bakı şəhəri, Yasamal rayonu, Murtuza Muxtarov küçəsi, ev 145 ünvanındakı dəyəri 190 min manat olan 80,30 kv.metrlik, dəyəri 491 min manat olan 216,3 kv.metrlik və dəyəri 326 min manat olan 143,4 kv.metrlik 3 qeyri yaşayış sahəsindən, “Atra Bank”a məxsus Bakı şəhəri, Nizami rayonu, Qara Qarayev prospektindəki dəyəri 1,6 milyon manat olan 436,2 kv.metrlik qeyri yaşayış sahəsindən, “Yunayted Kredit Bank”a məxsus Bakı şəhəri, Nərimanov rayonu, Ədhəm Orucəliyev küçəsi, 5A ünvanındakı dəyəri 800 min manat olan 154,4 kv.metrlik qeyri yaşayış sahəsindən, “Atabank”a məxsus Şirvan şəhəri, Heydər Əliyev prospektindəki dəyəri 430 min manat olan 275,7 kv.metrlik əsas, 39 kv.metrlik köməkçi 2 mərtəbəli qeyri-yaşayış binasından və Şamaxı şəhəri, Şəhriyar küçəsi, 22 ünvanındakı dəyəri 490 min manat olan 279,3 kv.metrlik qeyri-yaşayış binasından, “Bank Standard”a məxsus Bakı şəhəri, Nəsimi rayonu, Bülbül prospekti, 56A ünvanındakı dəyəri 1,1 milyon manat olan 345 kv.metrlik qeyri yaşayış sahəsindən və Bakı şəhəri, Xəzər rayonu, Şüvəlan qəsəbəsindəki dəyəri 750 min manat olan 0,75 hektar bağ sahəsindən gedir.