Günəş aktivliyi zəlzələlərə səbəb ola bilər

Tsukuba Universiteti və Yaponiyanın Qabaqcıl Sənaye Elmləri və Texnologiyaları Milli İnstitutundan olan yapon alimləri Günəş aktivliyi, Yerin iqlimi və seysmik fəallıq arasında mümkün əlaqəni müəyyən ediblər.

Bu barədə araşdırmanın nəticələri "Chaos" elmi jurnalında dərc olunub.

Mütəxəssislər zəlzələlər, Günəş aktivliyi və Yer səthinin temperaturu ilə bağlı məlumatları təhlil etmək üçün riyazi və hesablama üsullarından istifadə ediblər. Alimlər kəşf ediblər ki, Yer səthinin temperaturu ilə bağlı məlumatların modellərə daxil edilməsi, proqnozun, xüsusilə dərin olmayan zəlzələlər üçün dəqiqliyini artırıb.

Günəş aktivliyi ilə əlaqədar planetin səthinin temperaturunun dəyişməsi süxurların xassələrinə təsir edərək onları daha kövrək və çatlamağa meyilli edir. Bu proseslər, həmçinin yeraltı suların hərəkətini də dəyişməyə qadirdir ki, bu da öz növbəsində tektonik plitələrin sərhədlərində təzyiqi dəyişə bilər.

Tədqiqat göstərib ki, Günəş istiliyinin Yer səthinə ötürülməsi cüzi olsa da, seysmik aktivliyə təsir göstərə bilər.

Kəşf müəllifləri hesab edirlər ki, Günəş aktivliyi proqnozlarının Yerin temperatur modellərinə daxil edilməsi zəlzələlərin proqnozlaşdırılmasının təkmilləşdirilməsi üçün mühüm alət ola bilər.