VHP-dən Tənzilə Rüstəmxanlının hacı Şahinlə bağlı açıqlaması barədə BƏYANAT

"Milli Məclisin İctimai birliklər və dini qurumlar komitəsinin son iclası ilə bağlı mətbuatda gedən məlumatlarda deputat Tənzilə Rüstəmxanlının fikirləri geniş şəkildə işıqlandırılmayıb. Belə ki, onun şəhidlərlə bərabər hacı Şahin Həsənliyə də salavat gətirilməsinə etirazı xüsusi qabardılaraq məsələ yanlış təqdim edilib".

Bu, Vətəndaş Həmrəyliyi Partiyasının (VHP) yaydığı bəyanatda öz əksini tapıb.

Bildirilib ki, Tənzilə Rüstəmxanlının çıxışında hacı Şahinin ruhunu incidəcək bircə kəlməsi də olmayıb.

"Dünyada hörmət sahibi olan din xadimləri çoxdur, lakin onlar şəhadətə Allah və millət yolunda qovuşmayıblarsa, şəhid sayıla bilməzlər. Allah hacı Şahinə rəhmət eləsin. Xalqımız arasında böyük hörmət-izzəti var idi, ruhu sayğı ilə anılır. Vaxtsız ölümünə hər kəs ürəkdən kədərləndi. Amma hacı Şahin şəhid deyil axı! Hacının adı hər yerdə hörmətlə xatırlanır, adına minlərlə insan hər gün salavat çevirir. Vacib deyil ki, o, həm də şəhid sayılsın. Bunu heç özü də məqbul saymazdı", - bəyanatda vurğulanıb.

Qeyd edək ki, ötən gün Milli Məclisin İctimai birliklər və dini qurumlar komitəsinin iclasında millət vəkili, VHP sədrinin müşaviri T.Rüstəmxanlı şəhidlərlə yanaşı hacı Şahinə də salavat gətirilməsinə etiraz edib.