Dələduzluqda və hədə-qorxu yolu ilə pul tələb etməkdə təqsirli bilinən Hacıqabul rayon sakini, 1980-ci il təvəllüdlü Güləhməd Mirzəyevin cinayət işi üzrə məhkəmə prosesi başa çatıb.
Median.Az ölkə.az-a istinadən xəbər verir ki, Hacıqabul şəhər sakini Sübhan Babayev Samirə Səlimova (zərərçəkmişlərin ad və soyadları şərti göstərilib - red.) ilə qeyri-təbii yolla intim münasibətdə olub və bunu videoya çəkib.
Güləhməd Mirzəyev də həmin intim münasibəti əks etdirən pornoqrafik xarakterli videogörüntüləri əldə edə bilib.
Güləhməd Mirzəyev 2015-ci ilin aprel ayının ortalarında Şirvan şəhərində yerləşən "Sərvət" şadlıq sarayının qarşısındakı kafelərin birində Sübhan Babayevlə görüşüb.
Bu zaman Güləhməd Mirzəyev Sübhan Babayevə Samirə Səlimova ilə qeyri-təbii yolla intim münasibətlərini əks etdirən pornoqrafik xarakterli videogörüntülərini əldə etdiyini deyib. O, Sübhan Babayevi həmin rüsvayedici məlumatları yayacağı ilə hədələyib.
Bu videogörüntülərlə Güləhməd Mirzəyev Sübhan Babayevi hədələyərək 15 min manat verməsini tələb edib. Təxminən aprelin 18 və ya 19-da Güləhməd Mirzəyev Hacıqabul şəhəri ərazisindəki "Nar bazarı" adlanan yerdəki torpaq sahəsində Sübhan Babayevin 15.000 manat nağd pulunu alıb.
Bundan əlavə, Güləhməd Mirzəyev tanışı Natiq Kazımovla əvvəlcədən razılaşıb və cinayət əlaqəsinə girib. Onlar birlikdə yenidən Sübhan Babayevi həmin pornoqrafik video ilə şantaj etməyə başlayıblar.
Natiq Kazımov Sübhan Babayevə Samirə Səlimova ilə qeyri-təbii yolla intim münasibətlərini əks etdirən pornoqrafik xarakterli videogörüntülərin olduğunu, həmin görüntülərin Hacıqabul və Şirvan şəhərlərində yayılacağından xəbərdar olduğunu deyib.
Bu səbəbdən Natiq Kazımov 2015-ci il aprel ayının sonlarında Hacıqabul şəhəri ərazisindəki "Nar bazarı" adlanan yerdəki torpaq sahəsində Sübhan Babayevlə görüşüb, həmin video görüntülərin mənbəyinin kimliyi haqqında məlumatları bildiyini söyləyib. Natiq Kazımov Sübhana 5.000 manat pul müqabilində həmin görüntülərin yayılmasının qarşısını ala biləcəyini bildirib.
Bundan sonra Güləhməd Mirzəyev 3 may 2015-ci il tarixdə Hacıqabul şəhəri ərazisindəki "Nar bazarı" adlanan yerdəki torpaq sahəsində Sübhan Babayevlə görüşüb. O, Sübhana Samirə Səlimova ilə olan videogörüntülərin yayılmasının qarşısını alacağını vəd verib və aldatma yolu ilə Sübhan Babayevin 5.000 manat nağd pulunu ələ keçirib. Güləhməd Mirzəyev zərərçəkmişdən aldığı pulun 1200 manatını Natiq Kazımova verib.
Güləhməd Mirzəyev 19 oktyabr 2015-ci il tarixdə istintaqa məlum olmayan mənbədən satış məqsədi ilə 3,198 qram çəkidə narkotik vasitə əldə edib. Onun narkotik vasitələrin qanunsuz dövriyyəsilə məşğul olması barədə daxil olmuş məlumata əsasən, Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin əməkdaşları oktyabrın 20-də əməliyyat keçirib.
Keçirilən əməliyyat-axtarış tədbiri nəticəsində həmin gün saat 17.20-də Hacıqabul rayonu, İsmət Qayıbov küçəsində yerləşən "Hadisə Yeri" adlanan çay evinin qarşısında Güləhməd Mirzəyev saxlanılıb. Onun üzərinə baxış keçirilən zaman narkotik vasitə aşkar olunub.
Güləhməd Mirzəyev Cinayət Məcəlləsinin 178.2.1-ci (qabaqcadan əlbir olan bir qrup şəxs tərəfindən dələduzluq törətmək), 178.2.2-ci (təkrar dələduzluq törətmək), 178.2.4-cü (xeyli miqdarda ziyan vurmaqla dələduzluq törətmək), 182.3.2-ci (külli miqdarda əmlak əldə etmək məqsədi ilə hədə-qorxu gəlmək) və 234.4.3-cü (qanunsuz olaraq külli miqdarda narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma) maddələri ilə ittiham olunub.
Qeyd edək ki, digər təqsirləndirilən Natiq Kazımov isə Cinayət Məcəlləsinin 178.2.1 və 182.3.2-ci maddələri ilə təqsirli bilinib.
Lənkəran Ağır Cinayətlər Məhkəməsinin hökmü ilə Güləhməd Mirzəyev 11 il 6 ay müddətinə azadlıqdan məhrum edilib.
Digər təqsirləndirilən Natiq Kazımovun barəsində Cinayət Məcəlləsinin 70-ci (şərti məhkum etmə) maddəsi tətbiq edilib və o, şərti cəza alaraq məhkəmə zalından azadlığa buraxılıb.
Hökmdən narazı qalan Güləhməd Mirzəyev apelyasiya şikayəti verib. O, şikayətində günahsız olduğunu və barəsində bəraət hökmünün çıxarılmasını istəyib.
Güləhməd Mirzəyevin şikayəti araşdırılması üçün Şirvan Apelyasiya Məhkəməsinə göndərilib. Apelyasiya şikayəti hakim Zəki Babayevin sədrlik etdiyi prosesdə araşdırılıb.
Qərara görə, Lənkəran Ağır Cinayətlər Məhkəməsinin hökmü dəyişdirilib. Məhkəmə Güləhməd Mirzəyevin ittiham olunduğu Cinayət Məcəlləsinin 234.4.3-cü maddəsini həmin məcəllənin 234.1-ci (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) maddəsinə tövsüf edilib, onun cəzası 11 il 3 aya endirilib. Hökm qalan hissədə dəyişdirilməyib.
Bu qərardan Güləhməd Mirzəyev kasasiya şikayəti verib. Onun şikayətinə Ali Məhkəmədə hakim Gülzar Rzayevanın sədrliyi ilə baxılıb.
Hakim kollegiyası Güləhməd Mirzəyevin kasasiya şikayətinin qismən təmin edilməsi barədə qərar elan edib.
Qərara görə, Güləhməd Mirzəyevin ittiham olunduğu Cinayət Məcəlləsinin 182.3.2-ci maddəsi həmin məcəllənin 182.2.4-cü maddəsinə tövsif edilib.
Onun ittiham edildiyi Cinayət Məcəlləsinin 178.2.4-cü maddəsi məhkəmə aktından xaric edilib.
Güləhməd Mirzəyevin cəzası 10 ilə endirilib.
Şahidi olduğunuz hadisələri çəkib bizə göndərin!
Son Əlavə