Bakı Ağır Cinayətlər Məhkəməsində Bakı şəhər sakini Nəsimi Qələndərovun CM-nin 181.2.2-ci (quldurluq, təkrar törədildikdə) maddəsi ilə təqsirləndirilməsinə dair cinayət işi üzrə məhkəmə prosesi başa çatıb.
Median.Az xəbər verir ki, ötən il mayın 7-də Abşeron rayon sakini Nuhbala İsmayılov DİN ''102 Zəng Mərkəzi''nə müraciət edərək bildirib ki, taksi fəaliyyəti ilə məşğul olarkən Mehdiabad qəsəbəsində tanımadığı şəxs idarə etdiyi "Tofaş" markalı avtomobilinə əyləşib Binəqədi qəsəbəsinə gedəcəyini deyib. Həmin ünvana çatanda sərnişin bıçaqla hədələyərək, ondan 200 manat pul alıb.
Məlumatla əlaqədar əməliyyat keçirən Binəqədi RPİ 4-cü polis bölməsinin əməkdaşları şəhər sakini, əvvəllər məhkum olunmuş Nəsimi Qələndərovu saxlayıblar. O, törətdiyi əməlini etiraf edib.
Araşdırma zamanı məlum olub ki, Qələndərov həmin gün başqa bir taksi sürücüsünə qarşı da quldurluq edib. O, Qubad Xudayevin "Mercedes" markalı avtomobilinə minərək eyni üsulla sürücünü bıçaqla hədələyib və ondan 90 manat pul alıb.
Məhkəmənin hökmü ilə təqsirləndirilən şəxs 10 il müddətinə azadlıqdan məhrumetmə cəzasına məhkum olunub.