Bakı Ağır Cinayətlər Məhkəməsində Bakı şəhər sakini Anar Mehtiyevin 29, 120.1-ci (qəsdən adam öldürməyə cəhd) və 315.2-ci (hakimiyyət nümayəndəsinə qarşı həyat və sağlamlıq üçün təhlükəli olan zor tətbiq etmə) maddəsi ilə təqsirləndirilməsinə dair cinayət işi üzrə hazırlıq iclası keçirilib.
Median.Az xəbər verir ki, Bakı Şəhər Prokurorluğunun yaydığı məlumata əsasən, bu il mayın 20-də saat 00:30 radələrində paytaxtın Nəsimi rayonu ərazisində mübahisə zamanı Anar Mehtiyev aralarında baş vermiş mübahisə zəminində 33 yaşlı Fərhad Ağayevi döyərək, ona ağır bədən xəsarəti yetirməsi faktı ilə əlaqədar Nəsimi RPİ İstintaq şöbəsində CM-nin 126.1-ci (qəsdən sağlamlığa ağır zərər vurma) maddəsi ilə cinayət işi başlanılıb.
Ayın 22-də rayon məhkəməsinin qərarı ilə A.Mehtiyev barəsində həbs qətimkan tədbiri seçilib.
Bununla yanaşı, Anar Mehtiyev şübhəli şəxs qismində tutulduqdan sonra Nəsimi RPİ-nin müvəqqəti saxlama yerinə aparılarkən Post-Patrul Xidməti (PPX) bölüyünün polis nəfəri Elnur Alıyevin üz nahiyəsinə yumruq zərbələri vurub. Polis əməkdaşının həyat və sağlamlıq üçün təhlükəli olan zor tətbiq etməsi faktına görə Nəsimi rayon prokurorluğunda mayın 23-də CM-nin 315.2-ci (hakimiyyət nümayəndəsinə qarşı həyat və sağlamlıq üçün təhlükəli olan zor tətbiq etmə) maddəsi ilə cinayət işi başlanılıb.
F.Ağayevə yetirilmiş xəsarətin həyat üçün təhlükəli olması nəzərə alınmaqla, Nəsimi RPİ-nin İstintaq şöbəsində istintaqı aparılan cinayət işi CM-nin 126.1-ci maddəsindən 29, 120.1-ci (qəsdən adam öldürməyə cəhd) maddəsinə tövsif edilib və həmin cinayət işi Nəsimi rayon prokurorluğunda CM-nin 315.2-ci maddəsi ilə istintaq edilən cinayət işinə birləşdirilib.
Hazırlıq iclasında təqsirləndirilən şəxsin anket məlumatları dəqiqləşdirilib.
İş üzrə baxış oktyabrın 10-na təyin edilib.